નવી દિલ્હી, તા. 9 : ઝિમ્બાબ્વે
સામેની બીજી ટેસ્ટ મેચમાં ન્યૂઝીલેન્ડની એક દાવ અને 359 રને જબરદસ્ત જીત થઈ છે. ઝિમ્બાબ્વેની
ટીમ પહેલી ઈનિંગ્સમાં 125 રનમાં ઓલઆઉટ
થઈ હતી. બાદમાં ન્યૂઝીલેન્ડે ત્રણ ખેલાડીની દોઢી સદીથી ત્રણ વિકેટે 601 રને દાવ ડિક્લેર કર્યો હતો.
જવાબમાં બીજા દાવમાં પણ ઝિમ્બાબ્વેના ખેલાડીઓ ટકી શક્યા નહોતા અને 117 રનમાં જ ટીમ ઓલઆઉટ થઈ હતી.
ઝિમ્બાબ્વેએ ટોસ જીતીને પહેલા બેટિંગ પસંદ કરી હતી. જો કે, પૂરી ટીમ પહેલી ઈનિંગ્સમાં 125 રનમાં જ ઓલઆઉટ થઈ હતી. બાદમાં
ન્યૂઝીલેન્ડે પહેલી ઈનિંગ્સમાં કોનવેના 153 રન, હેનરી નિકોલસના
150 રન અને રચિન રવીન્દ્રના 165 રનની મદદથી ત્રણ વિકેટે 601 રને ઈનિંગ્સ ઘોષિત કરી દીધી
હતી. આમ ઝિમ્બાબ્વે ઉપર મોટું દબાણ આવ્યું હતું. આ દબાણની અસર ફરી જોવા મળી હતી અને
ટીમ 117 રનમાં ઓલઆઉટ થઈ હતી. ઝિમ્બાબ્વે
તરફથી નીક વેલ્ચ એકમાત્ર ખેલાડી રમી શક્યો હતો, જેણે 47 રન કર્યા
હતા. બીજી ઈનિંગ્સમાં ઝેકરી ફોક્સે 37 રનમાં પાંચ વિકેટ લીધી હતી.
