ભુજ, તા. 10 : કચ્છની ધણિયાણી મા આશાપુરાના
માતાના મઢ સ્થિત સ્થાનકે આસો નવરાત્રિ દરમ્યાન પતરીવિધિ કરવાના મામલે કચ્છના રાજ પરિવાર
વચ્ચે છેલ્લા લાંબા સમયથી ચાલી રહેલા વિવાદ દરમ્યાન થયેલા બદનક્ષીના બે જુદા-જુદા દાવા
નખત્રાણાની અદાલતે કાઢી નાખવાનો આદેશ કર્યો હતો. રાજ પરિવારના સદ્ગત પ્રાગમલજી-ત્રીજા
દ્વારા 20 કરોડનો અને નલિયાના જુવાનસિંહ
હમીરજી જાડેજા દ્વારા કરાયેલા ચાર કરોડના બદનક્ષીના આ બે દાવા રદ કરવા સાથે રાજ પરિવારના
ઉભય પક્ષ હનુવંતસિંહજી તથા માતાના મઢ જાગીરના અધ્યક્ષ રાજાબાવા યોગેન્દ્રસિંહજી વિગેરે
તરફે આ ચુકાદા અપાયા હતા. આ દાવાઓમાં પ્રાગમલજી-ત્રીજાનું અવસાન થતાં તેમનાં પત્ની
પ્રીતિદેવી અને જુવાનસિંહ જાડેજાનું અવસાન થતાં તેમના પુત્ર ઈન્દ્રજિતસિંહ જાડેજા પક્ષકાર
તરીકે જોડાયા હતા. વર્ષ-2009માં નવરાત્રિ
દરમ્યાન પ્રાગમલજી-ત્રીજાએ પોતાના પ્રતિનિધિ તરીકે નલિયાના જુવાનસિંહ જાડેજાના હસ્તે
પતરીવિધિ કરાવવા માટેનો પ્રયાસ કર્યો હતો. મઢ જાગીરના અધ્યક્ષ અને મંદિરના મહંત રાજાબાવા
યોગેન્દ્રસિંહજીએ તેમને આમ કરતાં અટકાવ્યા હતા. આ વિવાદને લઈને ઈતિહાસમાં પ્રથમવાર
પતરીની વિધિ થઈ શકી ન હતી. બાદમાં પ્રાગમલજી-ત્રીજાએ યોગેન્દ્રસિંહજી સામે 20 કરોડનો માનહાનિનો દાવો કર્યો
હતો, જ્યારે જુવાનસિંહે ચાર કરોડનો બદનક્ષીનો દાવો
કર્યો હતો. બંને પક્ષની દલીલો અને રજૂઆતો સાંભળી, જરૂરી આધાર-પુરાવા
તપાસી નખત્રાણાની પ્રિન્સિપાલ સિનિયર સિવિલ
અદાલતે આ બંને દાવા નકારી કાઢતો આદેશ કર્યો હતો. આ કેસની સુનાવણીમાં યોગેન્દ્રસિંહ
વતી વકીલ તરીકે વરિષ્ઠ ધારાશાત્રી જે.કે. ઠક્કર તથા હનુવંતસિંહજી વતી વકીલ તરીકે અત્રેના
વરિષ્ઠ ધારાશાત્રી યોગેશભાઈ ડી. ભંડારકર હાજર રહ્યા હતા.
