મુંબઈની
માળખાકીય સુવિધાઓમાં ધોળા હાથી કે શોભાના ગાંઠિયાનું બિરુદ મોનોરેલને આપી શકાય. 11
વર્ષથી શહેરમાં મોનોરેલ કાર્યરત હોવા છતાં અને આશરે વીસેક કિ.મી.ના પટ્ટા પર દોડતી
હોવા છતાં પરિવહનના ઉપયોગી અને અસરકારક માધ્યમ તરીકે તેની ગણના થતી નથી. આર્થિક રીતે
નુકસાનીમાં ચાલતી મોનોરેલનો બે દિવસ મુંબઈમાં ધમરોળનાર વરસાદના બીજા દિવસે ઉપયોગી થવાનો
વારો આવ્યો ત્યારે આ સેવા અટકી ગઈ હતી. એટલું જ નહીં, 582 જણ ભરેલી મોનોરેલની બે રેક અધવચ્ચે અટકી
પડી ત્યારે અનેકના જીવ પડીકે બંધાઈ ગયા હતા. સદ્નસીબે, મોનોરેલ અટકી પડી એના કારણે કોઈ અપ્રિય ઘટના
બની નહોતી, પણ ફાયરબ્રિગેડે આગ ઓલવવા માટેની વિશાળકાય
સીડીઓનો ઉપયોગ મોનોરેલમાં અટવાઈ ગયેલા ઉતારુઓને બહાર કાઢવા માટે કરવો પડયો. મંગળવારે
સાંજે છ વાગીને આડત્રીસ મિનિટે ભક્તિ પાર્ક અને મૈસૂર કોલોની વચ્ચે એક મોનોરેલ અટકી
ગઈ હતી, તો આચાર્ય અત્રે તથા વડાલા મોનોરેલ સ્ટેશન
વચ્ચે સાંજે સાડાસાત વાગ્યાની આસપાસ બીજી મોનોરેલ ખોટકાઈ ગઈ હતી. મોનોરેલના સંચાલકોએ
આ બે ઘટના માટે રેકમાં ક્ષમતા કરતાં વધુ ઉતારુઓ હોવાનું કારણ આગળ કરી પોતાનો બચાવ કર્યો
છે, તો રાજ્ય સરકારે ટેકનિકલ પ્રોબ્લેમ હોવાનું
જણાવી વધુ તપાસનું આશ્વાસન આપ્યું છે. છેક શરૂઆતથી જ વિવાદમાં રહેલી મોનોરેલે અણીના
સમયે મુંબઈગરાને દગો આપ્યો હોય એવી આ પહેલી ઘટના નથી. મુંબઈને શાંઘાઈ બનાવવાની આંબા-આંબલી રાજકારણીઓ નાગરિકોને
વર્ષોથી દેખાડયા કરે છે, પણ
મુંબઈગરાના ભાગે તો દર વર્ષે ચોમાસાંમાં અને ક્યારેક કોઈ પણ મોસમમાં હાલાકીનો સામનો
કરવાનો આવે છે. ગત સોમ અને મંગળવારે શહેર તથા ઉપનગરોને ધમરોળનાર વરસાદને પગલે રેલવે
સેવા અને ઠેર-ઠેર પાણી ભરાઈ જવાને કારણે જનજીવન અસ્તવ્યસ્ત થઈ ગયું. મધ્ય રેલવે અને
હાર્બર લાઈનની સેવા તો ઠપ થઈ ગઈ હતી. આવામાં, નોકરી-ધંધેથી ઘરે પહોંચવા માટે મોનોરેલનો આશરો લેનારા કમભાગી મુંબઈગરાઓને
ત્રણ કલાક બંધ પડેલી મોનોરેલમાં ગોંધાઈ રહેવું પડયું હતું. મોનોરેલ સંચાલકોનું કહેવું
છે કે, ઉતારુઓના વધુ પડતા ધસારાને કારણે મોનોરેલમાં
કુલ વજન 109 મેટ્રિક ટનથી વટાવી ગયું હતું, આ ટ્રેનની મૂળ ક્ષમતા 104 મેટ્રિક ટન છે. આ વધુ વજનને કારણે પાવર રેલ અને
કરન્ટ લોકેટર વચ્ચેનો મેકેનિકલ સંપર્ક તૂટી ગયો હતો, ટ્રેન ચલાવવા માટે જરૂરી વીજળીનો પ્રવાહ તેના કારણે
અટકી ગયો હતો. સાંજે સાડા છ વાગ્યાથી અટકેલી મોનોરેલમાંથી 582 ઉતારુને ઉગારવાની બચાવ
કામગીરી રાત્રે સવા દસ વાગ્યા સુધી ચાલી હતી. સદ્નસીબે, કોઈને ગંભીર ઈજા કે સમસ્યા થઈ નહોતી, પણ આ ઘટનાથી મુંબઈની નબળી સુવિધાઓની પોલ વધુ
એકવાર ખૂલી ગઈ હતી.
