ભુજ, તા. 7 : અબડાસાના પિંગલેશ્વરથી સિંધોડી
વચ્ચે પરવાનગી વગર ધમધમતી કોલસાની ભઠ્ઠી પર વન વિભાગ દ્વારા કાયદેસરની કાર્યવાહી કરવામાં
આવી હતી. કચ્છ પશ્ચિમ વન વિભાગના કાર્યક્ષેત્ર હેઠળના નલિયા દક્ષિણ રેન્જના પિંગલેશ્વરથી
સિંધોડી મોટી રોડની પશ્ચિમ બાજુએ સિંધોડી નાની ગામની સરકારી પડતર જમીનમાં પરવાનગી વગર
ગાંડા બાવળના લાકડાંમાંથી કોલસા બનાવવા માટે કોલસાની પાકી ભઠ્ઠી ગેરકાયદેસર રીતે સ્થાપતાં
આ બાબતે આરોપી પ્રકાશ રામજી કોલી (રહે. રાપર ગઢવાળી,
તા. અબડાસા) વિરુદ્ધ કાયદેસરની કાર્યવાહી કરવામાં આવી છે. જુલાઈ માસથી
15 ઓક્ટોબર સુધી ચોમાસા ઋતુ દરમ્યાન
કોલસા બનાવવા માટે વન વિભાગ દ્વારા પરવાનગી આપવામાં આવતી નથી. તેમ છતાં જો કોઈ આવી
ગેરકાયદેસર પ્રવૃત્તિ ધ્યાને આવશે તો આવા બનાવ કોઈને ધ્યાને આવે તો નજીકના વન કર્મચારી
અને કચેરીને જાણ કરવા નાયબ વન સંરક્ષક, કચ્છ પશ્ચિમ વન વિભાગ, ભુજ દ્વારા અપીલ કરાયાનું માહિતી
ખાતાની યાદીમાં જણાવાયું છે.
