ગાંધીધામ, તા. 6 : સામાન્ય રીતે તસ્કરો રોકડ રકમ, સોનું, દાગીના ચોરી જતા
હોય છે પણ રાપર તાલુકાના સઇ ગામમાં અનોખા ચોર પ્રગટ થયા છે, જેને
દાગીનામાં નહીં પણ સીધા વીજતંત્રના 100 કિલોના ભારેખમ ટ્રાન્સફોર્મર (ટી.સી.)માં જ રસ પડયો હતો. સઇ
ગામમાં રહેતા વૃદ્ધ એવા નારણ હીરા રાવરિયા (પટેલ)એ બનાવ અંગે પોલીસ મથકે ફરિયાદ નોંધાવી
હતી. ગામની વાણિયાર સીમમાં ગેબનશાપીરની દરગાહ આવેલી છે જ્યાં આ ફરિયાદી આરતી-પૂજા કરતા
હોય છે. આ દરગાહમાં રોશની રહે તે માટે ફરિયાદીએ પોતાનાં નામે વીજતંત્રનું ટ્રાન્સફોર્મર
મુકાવ્યું હતું. ગત તા. 4/8ના સાંજે
પૂજા કર્યા બાદ ગઇકાલે સવારે ફરિયાદી દરગાહે આવતાં લાઇટ નહોતી, તેમણે બોર્ડ તપાસ કરતાં તેમાં પણ વીજળી આવતી
નહોતી. અંધારું હોવાથી લાઇટ કાપ હશે તેવું તેમણે જાણ્યું હશે, પણ બહાર જઇને જોતાં મકાન જેવડું આખું ટ્રાન્સફોર્મર જ ગાયબ હતું. તસ્કરોએ વાયર
કાપીને થાંભલેથી રૂા. 32,000નું ટ્રાન્સફોર્મર
કઇ રીતે ઉતારી લીધું એ જોઇને ગામલોકો પણ અવાક થઇ ગયા હતા. આ અંગે તપાસ બાદ વીજળીપ્રેમી તસ્કરો જ આ મોટું કામ કરી ગયાનું બહાર આવ્યું હતું.
પોલીસ મથકે ફરિયાદ બાદ આટલું ભારે ટ્રાન્સફોર્મર તસ્કરો પોતાના બળદગાડામાં લઇ ગયા કે
પછી કોઇ સુપરહીરો આવીને ઉપાડી ગયો તે અંગે પોલીસ પણ વિચારમાં પડી છે. આ વીજળીચોરને
પકડી પાડવા આગળની તપાસ પોલીસે હાથ ધરી છે.
