લક્ષ્યની લાજવાબ વાપસી, ભારતનો મેડલ પાકો

નાગોયા, તા. 22 : એશિયન ગેમ્સમાં બેડમિન્ટન કવાર્ટર ફાઇલનમાં ભારતનો લક્ષ્ય સેન જાપાનના કોડાઇ નારોકા સામે ખરાબ રીતે પાછળ હોવા છતાં યાદગાર વાપસી કરીને જીત મેળવી હતી. ભારતીય બેડમિન્ટન ટીમે જાપાનને 3-0થી હરાવીને સેમિફાઇનલ પ્રવેશ કર્યો હતો અને ચંદ્રક સુનિશ્ચિત બનાવ્યો. એક કલાક 6 મિનિટની મેચમાં લક્ષ્ય પહેલી ગેમ 11-21થી હાર્યો, પણ પછી સપોર્ટ સ્ટાફની સલાહ બાદ રમત બદલીને બીજી ગેમ 21-5થી કબજે કરી ત્રીજી ગેમમાં તે 6-11થી પાછળ હતો, પણ પછી સતત શટલનો બચાવ કરીને ફલેટ હાફ સ્મેશ સાથે લડતો રહ્યો અને આખરે 21-19થી જીત મેળવી. પ્રથમ ડબલ્સ રમતા, સાત્ત્વિકસાઇરાજ રંકીરેડ્ડી અને ચિરાગ શેટ્ટી, જેમણે આ સિઝનમાં બે ટાઇટલ જીત્યા છે. તેમણે ભૂતપૂર્વ વિશ્વ ચેમ્પિયન હોકી ટાકુરો અને કોબાયાશી યુગો પર 21-18, 24-22થી વિજય નોંધાવ્યો અને ભારતની લીડ 2-0 સુધી લંબાવી હતી. આ વર્ષે બેડમિન્ટન એશિયા ચેમ્પિયનશિપના ફાઇનલિસ્ટ આયુષ શેટ્ટીએ પ્રભાવશાળી પ્રદર્શન કરીને વિશ્વના 16મા ક્રમાંકિત ખેલાડી કોકી વાતાનાબેને 21-10, 21-19થી હરાવીને મેચ અને ભારત માટે મેડલ જીત્યો હતો. બુધવારે ભારતનો મુકાબલો સેમિ-ફોરમાં ડિફેન્ડિંગ ચેમ્પિયન ચીન અને કોરિયા વચ્ચે રમાનારી બીજી કવાર્ટર ફાઇનલના વિજેતા સાથે થશે.