બળદિયા ગામની વિવિધ સમસ્યાના ઉકેલ માટે તંત્ર સમક્ષ કોંગ્રેસની માંગ

ભુજ, તા. 23 : બળદિયા ગામમાં વિવિધ સમસ્યાઓ દૂર કરવા તંત્ર સમક્ષ જિલ્લા કોંગ્રેસ પ્રમુખ વી. કે. હુંબલ દ્વારા માંગ કરાઈ હતી. આ ગામમાં ગૌચર જમીનો અને સરકારી જમીનો પર મોટાપાયે કરાયેલાં દબાણો દૂર કરવા, ઓવરલોડ વાહનોને કારણે વડઝર, બળદિયા ગામના લોકોને પડતી મુશ્કેલી દૂર કરવા, બાયપાસ રસ્તો કાઢવા, ગરીબ લોકોને પ્લોટ-મકાનો ફાળવવા સહિતની રજૂઆતો કરાઈ હતી. આ અંગે ગામલોકો દ્વારા રસ્તા રોકો આંદોલન કરાયું હોવા છતાં તંત્ર દ્વારા કોઈ કાર્યવાહી કરાઈ ન હોવાની રજૂઆત પણ કરાઈ હતી. સત્વરે સમસ્યાઓના કાયમી નિરાકરણ માટે યોગ્ય પગલાં લેવા માંગ કરાઈ હતી.