વિકેન્દ્રીત જિલ્લા આયોજન માટે અંજાર તાલુકા આયોજન સમિતિની બેઠક યોજાઈ

અંજાર,તા.22 : અહીંની તાલુકા પંચાયત ખાતે વિકેન્દ્રીત જિલ્લા આયોજનની વિવિધ ગ્રાન્ટના કામોના આયોજન માટે અંજાર તાલુકા આયોજન સમિતિની બેઠક યોજાઇ હતી.  ટેકનિકલ અનો ઉચ્ચશિક્ષણ વિભાગના રાજયમંત્રી ત્રિકમભાઈ છાંગાના અધ્યક્ષતા સ્થાને યોજાયેલી આ બેઠકમાં તાલુકા આયોજન સમિતિના અધ્યક્ષ તથા તાલુકા પંચાયત પ્રમુખ  શોભનાબા જાડેજાની ઉપસ્થિતિમાં ગત બેઠકની કાર્યવાહી નોંધનું વાંચન અને બહાલી સાથે વર્ષ 2026-2027ના વર્ષ માટે આયોજનના કામોની દરખાસ્તો રજૂ કરાઇ હતી. જેમાં મળવાપાત્ર જનરલ ગ્રાન્ટના રૂ.107.50 લાખમાંથી સી.સી રોડ, પેવર  બ્લોક તથા અન્ય કામો તેમજ અંગભૂત ગ્રાન્ટના રૂ.15 લાખમાંથી સી.સી રોડ, પેવર બ્લોક તથા અન્યકામો, 5 ટકા પ્રોત્સાહકના મળવાપાત્ર 3.15 લાખ, ખાસ પ્લાન(બક્ષીપંચ)ના રૂ.5 લાખ એમ રૂ.130.65 લાખના આયોજનના કામોને મંજૂરી અપાઇ હતી. આ  વેળાએ  રાજ્યમંત્રીના  હસ્તે  વીરા અને ખેડોઇ ગામને રૂ.16 લાખના ખર્ચેના બે ટ્રેક્ટરનું તથા સમસ્ત અંજાર તાલુકા માટે રૂ.17 લાખના ખર્ચે જેટીંગ મશીનનું લોકાર્પણ કરવામાં આવ્યું હતું. બેઠકમાં તાલુકા પંચાયત ઉપપ્રમુખ ભૂરાભાઇ ડાંગર, જિલ્લા પંચાયત સદસ્ય મંજુલાબેન ડાંગર, લખીબેન ડાંગર, મશરૂભાઇ રબારી, મ્યાઝરભાઇ છાંગા તથા તાલુકા સામાજિક ન્યાય સમિતિ ચેરેમેન રાણીબેન થારૂ, તાલુકા વિકાસ અધિકારી ભાવેશ પટેલ સહિત અધિકારીશ્રીઓ, પદાધિકારીઓ ઉપસ્થિત રહ્યા હતા.