ભાજપની જીતથી બંગાળમાં ડાબેરીઓ ખુશ !

કોલકાતા, તા. 4 : હિંદીમાં એક કહેવત છે કે બેગાની શાદીમાં અબ્દુલ્લા દિવાના. આ કહેવાત બંગાળમાં જોવા મળી હતી. બંગાળમાં ભાજપની જીત અને ટીએમસીની હાર વચ્ચે ડાબેરી પક્ષ માકપાના કાર્યકરો દ્વારા ઉજવણીની તસવીરો સામે આવી હતી. આ ઉજવણી જીતની નહીં પણ રાજકીય સમતુલન બદલવાના સંકેતની હતી. માકર્સવાદી પક્ષનાં કાર્યાલયોમાં ભીડ, નારેબાજી અને ઉત્સાહ સંકેત આપી રહ્યા હતા કે વામપંથી છાવણી માટે આ માત્ર સીટની રમત નહીં પણ મનોવૈજ્ઞાનિક લડાઈમાં પણ વાપસીનો સંકેત છે. કોલકાતાથી લઈને જિલ્લા કાર્યાલયોએ અસામાન્ય હલચલ જોવા મળી હતી. જેમ જેમ વલણ સામે આવતા ગયા તેમ તેમ માકપા કાર્યકરો એકત્રિત થવા લાગ્યા હતા. પાર્ટી કોઈપણ સ્થળે નિર્ણાયક બઢતમાં ન હોવા છતાં પણ ઉજવણી કરવામાં આવી રહી હતી. તેમાં પણ યુવા કાર્યકરોની હાજરી વધુ ધ્યાન ખેંચી રહી હતી. છેલ્લા એક દશકથી બંગાળની રાજનીતિ મુખ્ય રીતે ટીએમસી અને ભાજપ વચ્ચે હતી. તેવામાં વામપંથ લગભગ ગાયબ હતું. જો કે હવે ટીએમસીની કમજોરીને માકપા પોતાના માટે તક માની રહ્યું છે.