એક લાખ કરોડનું રોકાણ અને 11 નવાં એરપોર્ટ પર નજર

મુંદરા, તા. 23 : અદાણી ગ્રુપે ભારતનાં ઉડ્ડયન ક્ષેત્રમાં પોતાનું વર્ચસ્વ વધુ વિસ્તૃત કરવા માટે એક મોટું પગલું ભર્યું છે. મંગળવારે ગુજરાતના મુંદરા એરપોર્ટથી પ્રથમ કોમર્શિયલ ફ્લાઇટના ટેકઓફ સાથે ગ્રુપે આગામી પાંચ વર્ષમાં એરપોર્ટ ઇન્ફ્રાસ્ટ્રક્ચરમાં 90,000થી એક લાખ કરોડ રૂપિયાનાં મોટાં રોકાણની જાહેરાત કરી છે. ઉડાન યોજના હેઠળ શરૂ કરાયેલી આ નવી કનેક્ટિવિટી કચ્છ ક્ષેત્રની અર્થવ્યવસ્થાને જ નહીં પરંતુ દેશના ઉડ્ડયન અને લોજિસ્ટિક્સ ક્ષેત્રમાં પણ મહત્ત્વના વ્યૂહાત્મક ફેરફારો લાવશે તેવી શક્યતા છે. અદાણી એરપોર્ટ હોલ્ડિંગ્સના ડાયરેક્ટર જીત અદાણીએ મુંદરા એરપોર્ટથી વાણિજ્યિક ફ્લાઇટ્સ ફરી શરૂ થવાના પ્રસંગે મીડિયા સમક્ષ જણાવ્યું હતું કે, ગ્રુપ તેના ઉડ્ડયન પોર્ટફોલિયો પ્રત્યે ખૂબ જ ગંભીર છે.  આગામી પાંચ વર્ષમાં તમામ એરપોર્ટ પર રૂા. 90,000થી રૂા. એક લાખ કરોડનું રોકાણ કરવામાં આવશે અને આ યોજનાનો મજબૂત રીતે અમલ કરવામાં આવશે. જીત અદાણીએ વિવિધ પ્રશ્નોના જવાબ આપ્યા હતા. મુંદરા એરપોર્ટથી કયા શહેરોમાં ફ્લાઇટ્સ શરૂ કરવામાં આવી છે ? અદાણી  મુંદરા એરપોર્ટ, પ્રાદેશિક એરલાઇન સ્ટાર એર સાથે ભાગીદારીમાં મુંબઈ અને ગોવા માટે તેની પ્રથમ ફ્લાઇટ્સ શરૂ કરી છે. વધુમાં, સ્ટાર એર મુંદરાથી કુલ આઠ નવી ઉડાન શરૂ કરશે, જે તેને હિંડોન, સુરત, બેલગામ, બેંગ્લુરુ, કોલ્હાપુર અને નાંદેડ જેવા શહેરો સાથે જોડશે. આનાથી ઉદ્યોગપતિઓ અને પ્રવાસીઓ માટે ઝડપી રૂટ બનશે.  - નવા એરપોર્ટની હરાજી અંગે ગ્રુપની વ્યૂહરચના શું છે ?  : ભારત સરકાર ટૂંક સમયમાં 11 નવા એરપોર્ટ માટે ખાનગી બિડ આમંત્રિત કરશે. ગ્રુપ આ હરાજીમાં આક્રમક રીતે ભાગ લેશે. તેમણે એ પણ સ્પષ્ટ કર્યું કે, તેમનું ધ્યેય ઉડ્ડયન અર્થતંત્રના વિકાસમાં સતત તેમનો હિસ્સો વધારવાનો છે. હાલમાં, ગ્રુપ પાસે મુંબઈ, નવી મુંબઈ, અમદાવાદ, જયપુર, લખનઉ, તિરુવનંતપુરમ, મેંગલુરુ અને ગુવાહાટી સહિત આઠ એરપોર્ટનું સંચાલન કરવાનો અનુભવ છે. - કચ્છ અને મુંદરાના વ્યાપાર કેન્દ્ર માટે આ ફ્લાઇટ્સ શા માટે મહત્ત્વપૂર્ણ છે? : આ એરલિંક કચ્છ પ્રદેશને સંપૂર્ણ સંકલિત મલ્ટિ મોડેલ લોજિસ્ટિક્સ અને બિઝનેસ હબમાં પરિવર્તિત કરશે. તે ભારતના સૌથી મોટા ખાનગી બંદર (મુંદરા પોર્ટ) અને સૌથી મોટા મલ્ટિ પ્રોડક્ટ સ્પેશિયલ ઇકોનોમિક ઝોન (મુંદરા સેઝ) સાથે છેલ્લા માઇલ કનેક્ટિવિટી સુનિશ્ચિત કરશે. કંપની માને છે કે, આનાથી વાણિજ્યિક ટ્રાફિક વ્યવસ્થાપનમાં સુધારો થશે અને રાષ્ટ્રીય અને વૈશ્વિક સપ્લાય ચેઇન મજબૂત થશે. - આનાથી પર્યટન અને સ્થાનિક લોકોને શું સીધો ફાયદો થશે? : પહેલાં લોકોને મુંદરાથી મુંબઈ બે સ્ટોપ રૂટ દ્વારા મુસાફરી કરવી પડતી હતી, પરંતુ હવે ફ્લાઇટ આ મુસાફરીને ઘણી સરળ બનાવશે. વધુમાં, કચ્છનાં સાંસ્કૃતિક સ્થળો અને માંડવી બીચ જેવા વિસ્તારોમાં પ્રવાસનને નોંધપાત્ર પ્રોત્સાહન મળશે.