વ્હાઈટ કોટ તબીબી ક્ષેત્રનો ઉમદા વ્યવસાય

ભુજ, તા. 21 : વ્હાઈટ કોટ યાને ડોક્ટર  વિશ્વનો  ઉમદા વ્યવસાય છે, એવું ભુજ અદાણી મેડિકલ કોલેજ ખાતે આયોજિત 17મા વ્હાઇટ કોટ સેરેમની પ્રસંગે તબીબ બનવા મેડિકલ જગતમાં 150 નવોદિતે પગરણ માંડયા તે ટાંકણે ઉપસ્થિત કાર્યક્રમમાં મેડિકલ કોલેજ અને ગેઈમ્સના મહાનુભાવોએ જણાવ્યું હતું. કોલેજના ઓડિટોરિયમ ખાતે યોજાયેલા અંડર ગ્રેજ્યુએટ એમબીબીએસ બેચ 2025ના શ્રીગણેશ ટાંકણે  વર્ચ્યુલી જોડાયેલા અદાણી હેલ્થ કેર ગ્રુપના હેડ ડો. પંકજ દોશીએ  એમબીબીએસ કોર્સમાં પ્રવેશ મેળવનારા ભાવિ તબીબોને અને ઉપસ્થિત તેમના માતા-પિતાને  આવકારી  ખાતરી આપતા જણાવ્યું કે, તેમના બાળકોને ગેઈમ્સમાં ઘર જેવું જ વાતાવરણ મળશે. ગેઈમ્સના ડાયરેક્ટર ડો. બાલાજી પિલ્લાઈએ  મેડિકલ દુનિયામાં પ્રવેશ કરતા છાત્રોને આસિ. ડીન ડો. અજિત ખીલનાની, ડો. સચિન પાટિલ અને ડો. હિતેશ આસુદાની તેમજ અધિક મેડિકલ સુપ્રિટેન્ડેન્ટ ડો. વિવેક પટેલ સહિત ઉપસ્થિત રહ્યા હતા. પ્રો. ડો. પારસ પારેખ અને આસિ. મેનેજર ડો. મોનાલી જાનીએ કાર્યક્રમનું સંકલન કર્યું હતું. કાર્યક્રમને સફળ બનાવવા વિદ્યાર્થી વોલીન્ટિયર્સ, એડમિન સ્ટાફે જહેમત ઉઠાવી હતી. સંચાલન ચિરાગ વાળાએ અને જિયા નકુમે કર્યું હતું. - અદાણી મેડિ. કોલેજમાં આ વર્ષે કચ્છના 41 વિદ્યાર્થીએ વ્હાઇટ કોટ ધારણ કર્યો : કચ્છના વિદ્યાર્થીઓને હવે રીતસરની મેડિકલ અભ્યાસની ભૂખ ઊઘડી હોય તેમ વ્હાઇટ કોટ ધારણ કરવાની વાટ પકડી છે. અદાણી મેડિકલ કોલેજમાં 17મા વ્હાઇટ કોટ સેરેમનીમાં 150 વિદ્યાર્થી પૈકી 27 ટકા એટલે કે 41 તો કચ્છના છે, તેમાંય  ભુજમાં તો જાણે શિક્ષણ અને  મેડિકલ ક્ષેત્રે જાગૃતિના ઘોડાપુર ઊમટયા હોય તેમ કચ્છના 41 પૈકી 23 ભુજના છે, હવે આ રીતે ભુજ પણ ગુજરાતના અન્ય નગરની જેમ આ દિશામાં હરણફાળ ભરી રહ્યું છે. બીજી તરફ કચ્છની દીકરીઓએ તો દીકરાઓને પણ પાછળ રાખી દીધા છે. કચ્છના 41 ભાવિ તબીબ પૈકી 26  દીકરી છે ! જ્યારે 15 છોકરા છે. કચ્છના દૂર સુદુર એવા વર્માનગરથી પણ  વિદ્યાર્થીએ પ્રવેશ મેળવ્યા ઉપરાંત માંડવી, આદિપુર  અંજાર ગાંધીધામ,મુંદરા,નખત્રાણા, ભચાઉ અને માધાપરમાં પણ વિદ્યાર્થીઓ તબીબ બનવાની દિશામાં અગ્રેસર છે.