નવી દિલ્હી, તા. 11 : ભારતીય શેરબજારની
ચાલને ચાલાકીથી પ્રભાવિત કરવાના આરોપમાં અમેરિકાની ટ્રેડિંગ કંપની જેન સ્ટ્રીટને પ્રતિબંધિત
કર્યા બાદ હવે સમાચાર આવી રહ્યા છે કે, બજાર નિયામક સેબીએ પમ્પ એન્ડ ડમ્પ કરીને એટલે કે ખોટી માહિતી ફેલાવીને શેરના
ભાવમાં ચડાવ-ઉતાર કરવાની હેરાફેરી કરનારી બનાવટી (શેલ) કંપનીઓ ઉપર ધોંસ બોલાવી છે,
જેમાં સેબીની તપાસના દાયરામાં 200 જેટલી ખાનગી નોંધાયેલી કંપની
છે. આ 200 કંપનીઓના શેરના ભાવ કૃત્રિમ
રીતે વધારીને પછી નિર્દોષ-ભોળા રોકાણકારોને પધરાવી દેવામાં આવ્યા હોવાની આંશકા છે.
સૂત્રોનાં જણાવ્યા અનુસાર 150થી વધુ મોબાઈલ
અને 100થી વધુ કોમ્પ્યુટરોમાંથી મેળવવામાં
આવેલા ડેટાની તપાસ ચાલી રહી છે. તાજેતરમાં શરૂ કરવામાં આવેલી આ તપાસનાં છેલ્લાં ઓપરેશનમાં
80થી વધુ પરિસરોની તપાસ કરવામાં આવી હતી.
આ પહેલાં 30 જૂને સમાચાર આવેલા કે સેબી
આવી નકલી કપંનીઓનાં એક શંકાસ્પદ નેટવર્કની તપાસ કરી રહી છે. અમદાવાદથી સંચાલિત અનેક
કંપનીઓ કથિત રીતે સોશિયલ મીડિયા અભિયાનો અને ખોટા નિવેદનોથી રોકાણકારોને ભોળવીને શેરનાં
ભાવની હેરાફેરી કરતી હતી. આ ઘટનાક્રમોથી વાકેફ સૂત્રોના કહેવા અનુસાર અમદાવાદથી સંચાલિત
બંધ પડેલી કંપનીઓને પુનર્જીવિત કરવા અને હજારો રોકાણકારોને છેતરવા માટે પમ્પ એન્ડ ડમ્પની
ચાલબાજીની તપાસ કરવામાં આવી રહી છે. ઉલ્લેખનીય
છે કે, શેરબજારમાં પમ્પ એન્ડ ડમ્પ એવી ચાલાકીને કહેવામાં
આવે છે જેમાં બનાવટી (ખોખા) કંપનીનાં શેરોને તળિયાનાં ભાવેથી સતત ખરીદવામાં આવે છે
અને કૃત્રિમ રીતે તેના ભાવ વધારીને સામાન્ય રોકાણકારોને ખેંચવામાં આવે છે, જ્યારે રોકાણકારો તેમાં લેવાલી શરૂ કરે છે ત્યારે બધા શેરો તેમને ઊંચા ભાવે
પધરાવી દેવામાં આવે છે. ત્રણ દિવસ સુધી 80થી વધુ પરિસરોની મેરેથોન તપાસ દરમ્યાન 100 કોમ્પ્યુટર્સ તેમજ 150થી વધુ મોબાઈલમાંથી મેળવાયેલી
વિગતોનું પરીક્ષણ શરૂ કરાયું હતું. બનાવટી કંપનીઓનાં નેટવર્કમાં આ કાર્યવાહીએ ફફડાટ
ફેલાવ્યો છે.
