પશ્ચિમ બંગાળની ચૂંટણી પૂર્વે મમતાદીદી અમિત શાહને પડકારે છે!

પશ્ચિમ બંગાળ વિધાનસભાની ચૂંટણી હજુ દૂર છે, પણ માથા ઉપર ગાજે છે, ત્યારે મુખ્ય પ્રધાન મમતા બેનરજીએ કેન્દ્રીય તપાસ એજન્સીઓની કાર્યવાહીમાં દખલ કરીને સંવિધાન અને કેન્દ્ર સરકારને પડકારીને રાજકીય લડત શરૂ કરી છે. ચૂંટણી અંગેની વ્યૂહ - સલાહકાર કંપનીનાં કાર્યાલયો અને કંપનીના માલિકનાં નિવાસસ્થાને દરોડા પાડવા ગયેલા એન્ફોર્સમેન્ટ ડાયરેક્ટોરેટના અધિકારીઓને પડકારવા પોલીસ ફોજ લઈને મુખ્ય પ્રધાન પહોંચ્યાં અને કેટલીક ફાઇલો, લેપટોપ વગેરે ખૂંચવી લીધાં. હવે આ મામલો સુપ્રીમમાં પહોંચ્યો છે, પણ તે કાનૂની કરતાં રાજકીય વધુ છે. મુખ્યપ્રધાન કહે છે કે, આઈપેક નામની કંપનીને તૃણમૂલ કોંગ્રેસે ચૂંટણી સંબંધિત વ્યૂહ અને ડેટા-માહિતી માટે રોકી છે અને ઈડીએ આ બધી માહિતી જપ્ત કરી છે - `ચોરી લીધી છે'! ઈડીનું કહેવું છે કે, સીબીઆઇએ વર્ષ 2020માં કોલસાની સ્મગલિંગને ચોરીછૂપી કરવાના કેસમાં અનુપ માંઝી નામના શખ્સ સામે ફરિયાદ નોંધી હતી. તે પછી `મની લોન્ડરિંગ'ની માહિતી મળતાં વધુ તપાસ માટે ઈડી દ્વારા કાર્યવાહી થઈ રહી હતી. ઈડી સાથે કેન્દ્રીય પોલીસના માત્ર છ પોલીસ હતા, જ્યારે મુખ્યપ્રધાને સ્થાનિક પોલીસના કાફલા સાથે આવીને ફાઇલો, લેપટોપ, મોબાઇલ ફોન વગેરે ખૂંચવી લીધાં છે. પશ્ચિમ બંગાળમાં ઇસ્ટર્ન કોલ ફિલ્ડસ લિ.ની કોલસાની ખાણોમાંથી અનુપ માંઝી કોલસો ચોરીને રાજ્યનાં કારખાનાઓમાં વેચતો હતો. આ કેસની તપાસ દરમિયાન તૃણમૂલ કોંગ્રેસના રાષ્ટ્રીય મહામંત્રી અભિષેક બેનરજીનાં પત્ની રૂજીરા બેનરજીની પૂછપરછ અનુપ માંઝી સાથેના સંબંધ બાબત કરી હતી. આ તપાસ અને વિવાદનું મૂળ અહીં જ હોવું જોઈએ. મમતા બેનરજીએ ઈડીની કાર્યવાહી ઉપર `રેડ' કરી - છાપો માર્યો ત્યારે એમનો જમણો હાથ ગણાતા ભત્રીજા અભિષેક બેનરજી ઘટનાસ્થળે ન હતા તે નોંધપાત્ર છે. મુખ્ય પ્રશ્ન એ છે કે, કોલસાના સ્મગલિંગ અને મની લોન્ડરિંગની તપાસમાં ચૂંટણીને લગતી ફાઇલો કેવી રીતે આવી? અને મુખ્યપ્રધાને શા માટે ખૂંચવી લીધી? ચૂંટણી સલાહકાર કંપની જાણીતા ચૂંટણી નિષ્ણાત પ્રશાંત કિશોરે સ્થાપી હતી, પણ ચૂંટણી સિવાયના `કામ'માં પણ તેની સલાહ-સહાય લેવાતી હોય તે શક્ય છે. વિશેષ કરીને ચૂંટણીમાં નાણાકીય વ્યવહાર મુખ્ય હોય છે. આ સંજોગોમાં તપાસ દરમિયાન ચૂંટણીનો સંબંધ પકડાય તે પણ સ્વાભાવિક છે અને આ કારણે જ મમતાદીદી જાતે ઘટનાસ્થળે દોડયાં, ફાઇલો ખૂંચવી લીધી અને અમિત શાહ સામે ભડક્યાં છે! અત્યાર સુધી જ્યારે જ્યારે ભાજપે મમતાને પડકાર્યા છે ત્યારે ત્યારે મમતા દીદી મેદાને પડી ચૂક્યાં છે અને બંગાળની પ્રજાનો મૂડ પોતાની તરફેણમાં વાળી ચૂક્યાં છે. તાજી ઘટનામાં પણ તેમણે પોતાની આક્રમક શૈલી બતાવી છે, ભલે બંગાળ ચૂંટણીને હજી થોડો સમય છે, પણ તેઓ હળવાશથી લેવાના નથી. તેઓ કોઇ પણ મુદ્દાને બંગાળની અસ્મિતા સાથે જોડી દેવામાં માહેર છે, તો સામી તરફ અમિત શાહ આ વખતે બંગાળમાં જીત મેળવવા એડીચોટીનું જોર લગાવી રહ્યા છે, તેથી ઇડીના દરોડા હવે પછી બંગાળ ચૂંટણીમાં રાજકીય રીતે પડઘાતા રહેશે એમાં બે મત નથી. હવે સુપ્રીમમાં આ `તપાસ'ની વધુ વિગત પ્રકાશમાં આવવી જોઈએ અને તે પણ વિધાનસભાની ચૂંટણી પહેલાં આવવી જોઈએ. મમતા બેનરજીએ ભૂતકાળમાં પણ કેન્દ્રીય એજન્સીઓ સામે પોલીસ ફોજ ઉતારીને અધિકારીઓને ગુનેગારોની જેમ પકડયા હતા. હવે કેન્દ્રીય એજન્સીઓની કાર્યવાહીમાં દખલ કરવા બદલ પણ કાનૂની કાર્યવાહી થઈ શકે છે. પ્રશાંત કિશોરની આ કંપની તામિલનાડુમાં ડીએમકે શાસક પરિવાર સાથે પણ જોડાયેલી છે, તેથી ત્યાં પણ ઈડીની રેડ પડે તો નવાઈ નહીં. અલબત્ત, આ કાર્યવાહીના સમયને ચૂંટણી સાથે સંબંધ હોવાથી અન્ય વિપક્ષો સાવધાન છે!