અર્પિત ગંગર તરફથી : મુંબઈ, તા. 3 : જન્મભૂમિપત્રો ગુજરાતી ભાષાને
પ્રોત્સાહન આપવાનું અને ખાસ કરીને યુવાઓમાં આ ગરવી ભાષાને લઈને જાગૃતિ ફેલાવવાનું રીતસરનું
એક મિશન ચલાવે છે અને આ જ ગૌરવવંતી પરંપરામાં વધુ એક પ્રકરણ આલેખાયું છે. જન્મભૂમિ
દ્વારા એન્કર કંપનીના સહકારથી તાજેતરમાં યુવાઓમાં પ્રિય એવા પોપકોર્નના માધ્યમથી ગુજરાતી
પ્રત્યે વધુ આકર્ષિત કરવા માટે મુંબઈના ઘાટકોપરમાં પોપકોર્ન જંક્શન નામનો એક અનોખો
કાર્યક્રમ યોજાયો હતો. જાણીતા ગુજરાતી લેખક અને વક્તા જય વસાવડાએ પોપકોર્નના અર્થતંત્ર
તેના મહત્ત્વ અંગે રસપ્રદ વિશ્લેષણ કર્યું હતું. ડ્રીમ ગર્લ-2 અને રોકી ઔર રાની કી પ્રેમ કહાની જેવી ફિલ્મોમાં
પોતાના અવાજનો જાદુ બતાવી ચૂકેલી ઊભરતી પ્લેબેક સિંગર ચૈતાલી છાયાએ માહોલ જમાવ્યો હતો.
સ્પાર્કલ એન્ટરટેન્મેન્ટના રીટા હરિયાએ સુપેરે સંચાલન કર્યું હતું. - થિયેટરોમાં પોપકોર્ન કેવી રીતે
લોકપ્રિય બન્યું? : આજકાલ,
આપણે જોઈએ છીએ કે, મલ્ટિપ્લેક્સમાં પોપકોર્નની
કિંમત ઘણીવાર ફિલ્મ ટિકિટના ભાવ કરતાં વધારે હોય છે અને જય વસાવડા દ્વારા તેની પાછળનું
કારણ સમજાવવામાં આવ્યું હતું. સિનેમાઘરોમાં પોપકોર્ન કેવી રીતે રજૂ થયું તેનો ઇતિહાસ
પણ રજૂ કરવામાં આવ્યો હતો. લોકોએ પોપકોર્ન ખાવાનું શરૂ કર્યું, કારણ કે, તે ખાવામાં સરળ છે, ઓછો
કચરો થાય છે, ચાવતી વખતે કોઈ અવાજ ઉત્પન્ન થતો નથી અને જો તે
ફ્લોર પર પડે છે, તો પણ તેને ઉપાડવામાં સરળ છે (થિયેટર સ્ટાફના
દૃષ્ટિકોણથી). તેમણે તાજેતરની બ્લોકબસ્ટર બોલીવૂડ ફિલ્મ ધુરંધરના ઉદાહરણ સાથે વર્ણવ્યું
હતું કે, તે કેવી રીતે એ ફિલ્મે સિનેમાઘરોમાં પોપકોર્નનું વેચાણ
વધારવામાં મદદ કરી. જન્મભૂમિએ હંમેશાં ગુજરાતી ભાષાને પ્રોત્સાહન આપ્યું છે અને પોતાના
47મા કાર્યક્રમ અંતર્ગત તેણે એવું આયોજન કર્યું, જેમાં મનોરંજનની સાથે અર્થપૂર્ણ સંદેશ પણ હોય,
જેથી આ સંદેશ વધુ લોકો સુધી પહોંચે. આ ખ્યાલ કેવી રીતે વિકસાવવામાં આવ્યો
અને પોપકોર્ન જંક્શન કેવી રીતે અસ્તિત્વમાં આવ્યું તે વિશે વાત કરતાં જય વસાવડાએ કહ્યું
હતું કે, હાર્દિકભાઈ મામણિયા (સૌરાષ્ટ્ર ટ્રસ્ટના મેનાજિંગ ટ્રસ્ટી)એ
મને જન્મભૂમિ અને એન્કર સાથે મળીને પોપકોર્ન પર એક કાર્યક્રમ ડિઝાઇન કરવા કહ્યું હતું,
તે એટલો રસપ્રદ વિષય છે કે, પ્રેક્ષકો જોડાયેલા
રહે અને તે જ સાથે જ ગુજરાતીને પ્રોત્સાહન આપવાનો હેતુ પૂર્ણ થાય. - ખોરાક પ્રેમ જેવો છે.... : ખોરાક પ્રત્યે લોકોની માનસિકતા વિશે બોલતાં
જય વસાવડાએ ઉદાહરણો સાથે સુંદર રીતે સમજાવ્યું અને કહ્યું, ખોરાક પ્રેમ જેવો છે, જ્યારે આપણે ચોક્કસ ખોરાકને સુંઘીએ છીએ અથવા જોઈએ છીએ, ત્યારે આપણે તેના પ્રેમમાં પડી જઈએ છીએ. આપણે કિંમતની ચિંતા કર્યા વિના એ નિશ્ચિત
કરીએ છીએ કે, આપણે તે ખાવા માગીએ છીએ. આ મુદ્દાને સમજાવવા માટે તેમણે ઇન્ડિગો એરલાઇન્સનું
ઉદાહરણ આપ્યું, જેણે ભારે નુકસાન કર્યું અને પછી નાસ્તાના વેચાણથી
રૂા. 870 કરોડનો જંગી નફો કર્યો. જય
વસાવડાએ આનંદના સિદ્ધાંત વિશે પણ વાત કરી અને સુપ્રસિદ્ધ અભિનેતા દેવ આનંદનું ઉદાહરણ
આપ્યું, જેઓ જીવનભર સક્રિય રહ્યા અને તેમના કાર્ય અને
જીવનનો આનંદ માણતા રહ્યા. - ખાણી-પીણીના સંદર્ભના ગીતોની રજૂઆત : ચૈતાલીએ એવાં
ગીતો રજૂ કર્યાં જેમાં ખાદ્યપદાર્થોનો સંદર્ભ હતો. તેમના ભાવનાત્મક અને ઊર્જાવાન અવાજે
શ્રોતાઓને જકડી રાખ્યા હતા. ટિકિટ વેચાણમાંથી એકત્રિત થયેલી 100 ટકા રકમ બાળકોમાં વાંચન અને
શિક્ષણને પ્રોત્સાહન આપવા માટે `જુનિયર' ગુજરાતી સાપ્તાહિક અખબાર ભંડોળમાં દાનમાં આપવામાં
આવી છે. જન્મભૂમિ હંમેશાં નવીન અને પ્રાયોગિક કાર્યક્રમો સાથે આવે છે અને તેમની બાકીની
પહેલની જેમ, આ પહેલ પણ સફળ રહી હતી અને મિશન પૂર્ણ થયું હતું.
આ કાર્યક્રમ ફક્ત પ્રેમ, સંગીત અને અર્થશાસ્ત્ર વિશે નહોતો,
સાથે તેમાં રાષ્ટ્ર અને સંસ્કૃતિના સંરક્ષણ વિશેની નિસ્બત પણ હતી.
