ગાંધીધામ, તા. 2 : અંજાર તાલુકાનાં મેઘપર કુંભારડી
અંજલિ પાર્ક સોસાયટીમાં પાંચ શખ્સે માતા-પુત્ર
ઉપર હુમલો કરતાં મહિલાને અસ્થિભંગ સહિતની ઇજાઓ પહોંચી હતી. સામા પક્ષે પણ મરામારીની ફરિયાદ નોંધાઇ
હતી. મેઘપર કુંભારડીના મહેંદી નગરમાં રહેનાર શકીનાબેન ઇલિયાસ સોઢા તથા તેમનો પુત્ર
આસિફ ગત તા. 29/6ના જઇ રહ્યા હતા, ત્યારે તેમના પતિ ઇલિયાસ ઇબ્રાહીમ સોઢા,
સાસુ અસીનાબેને રોકાવ્યા હતા અને અમારો વીડિયો ડિલિટ કરી નાખજો તેવી
ધમકી આપી હતી. બાદમાં ફરીથી આ માતા-પુત્ર રાશન લેવા જઇ રહ્યા હતા, ત્યારે ઇલિયાસ, અસીનાબેન તથા મોસીન સલીમ સોઢા, રહેમતબેન સલીમ સોઢા,
અબ્બાસ સિધિક સોઢાએ તેમને રોકી ધોકા વડે હુમલો કર્યો હતો, જેમાં ફરિયાદી મહિલાને અસ્થિભંગ સહિતની ઇજાઓ પહોંચી હતી. સામા પક્ષે ઇલિયાસ
સોઢાએ પોતાની પત્ની શકીનાબેન તથા પુત્ર આસિફ
સામે ગુનો નોંધાવ્યો હતો. અગાઉના કોર્ટ કેસ મુદ્દે મનદુ:ખ રાખી આરોપીઓએ ફરિયાદી તથા
તેમના માતાને માર માર્યો હતો. પોલીસે બંને
પક્ષની ફરિયાદ નોંધીને આગળની કાર્યવાહી હાથ ધરી છે.
