ગ્રામ વિકાસનાં કામોમાં ગુણવત્તા જાળવજો

ભુજ, તા. 30 : શ્રમ, કૌશલ્ય વિકાસ અને  રોજગાર તથા ગ્રામીણ વિકાસ મંત્રી કુંવરજીભાઇ બાવળિયાએ ભચાઉ ખાતે શ્રમ, કૌશલ્ય વિકાસ અને રોજગાર તથા જિલ્લા ગ્રામ વિકાસ વિભાગના અધિકારીઓ સાથે સમીક્ષા બેઠક યોજીને કામગીરીની સમીક્ષા સાથે સુધારાત્મક જરૂરી સૂચનો આપ્યાં હતાં. ભચાઉ આઇ.ટી.આઇ. ખાતે આયોજિત બેઠકમાં મંત્રીએ જિલ્લાની 11 આઇ.ટી.આઇ.ની શૈક્ષણિક કામગીરી અંગે માહિતી મેળવીને ચાલતા ટ્રેડ કોર્સ, ખૂટતી સુવિધાઓ, મહેકમ તેમજ આગામી સમય તથા કચ્છની ઇન્ડસ્ટ્રીઝની જરૂરિયાતને અનુલક્ષીને યુવાનોને રોજગારીના સંદર્ભે નવી કૌશલ્ય તાલીમ આપવા બાબતે સમીક્ષા કરી હતી. ભચાઉમાં મુલાકાત લઈને ટ્રેડના ક્લાસરૂમ, છાત્રો દ્વારા બનાવેલા મોડલનું નિરીક્ષણ અને વિદ્યાર્થીઓ સાથે સંવાદ કર્યો હતો. શ્રમ, કૌશલ્ય વિકાસ અને રોજગાર વિભાગના અધિકારીઓ સાથે બેઠક યોજીને જરૂરી સૂચનો આપ્યાં હતાં. મંત્રીએ શ્રમ વિભાગની કામગીરીની સમીક્ષા કરતા શ્રમિકોને સરકારી યોજનાઓના મળવાપાત્ર લાભ, તેમની સલામતી, ઉદ્યોગોમાં નિયમિત ઇન્સ્પેક્શન, અકસ્માતના બનાવોમાં વળતર, સમાધાન કાર્યવાહી, ગ્રેચ્યુઈટી સહિતની બાબતોની માહિતી મેળવી હતી. જિલ્લા ગ્રામ વિકાસ એજન્સીના અધિકારીઓ, તાલુકા વિકાસ અધિકારીઓ સાથે બેઠક યોજીને જિલ્લામાં ગ્રામ વિકાસના ચાલતાં કામો જેવા કે, સ્વચ્છ ભારત મિશન (ગ્રા.), પ્રધાનમંત્રી આવાસ યોજના(ગ્રા.), મનરેગા, મિશન મંગલમ હેઠળ થતી વિવિધ કામોની સમીક્ષા કરી હતી. મંત્રીએ સામૂહિક કમ્પોસ્ટ પીટ, સેગ્રીગેશન શેડ, સામૂહિક શૌચાલય તથા શોકપીટ સહિતની સુવિધાના નિભાવ તથા અમલીકરણ માટેના પડકારોને ઉકેલવા મુદ્દે ચર્ચા કરી હતી. ડોર ટુ ડોર કચરાનું કલેક્શન થાય તે સુનિશ્ચિત કરવા, પ્રધાનમંત્રી આવાસ યોજનાનો લક્ષ્યાંક પૂર્ણ કરવા, પ્લોટ વિહોણા લાભાર્થીઓને પ્લોટ આપવા સક્રિય કામગીરી કરવા, બાંધકામની ગુણવત્તામાં બાંધછોડ ન કરવા, સ્વસહાય જૂથોને સક્રિય કરવા તેમજ નવા જૂથો માટે જાગૃતિ કામગીરી કરવા સહિતની બાબતે ભાર મૂક્યો હતો. પ્રાંત અધિકારી જ્યોતિબેન ગોહિલ, નાયબ જિલ્લા વિકાસ અધિકારી સી. આર. પ્રજાપતિ, તાલુકા વિકાસ અધિકારીઓ, જિલ્લા ગ્રામ વિકાસ એજન્સીના અધિકારીઓ, જિલ્લાના તમામ આચાર્યો, શ્રમ અને રોજગાર વિભાગના અધિકારીઓ સહિત સંબંધિત વિભાગના અધિકારીઓ તથા કર્મચારીઓ હાજર રહ્યા હતા.