દેશના ટોચના ધારાશાસ્ત્રીઓની યાદીમાં પ્રીતિ મહેતાનો `આઈકોન' તરીકે સમાવેશ

મુંબઈ, તા. 25 (અમારા પ્રતિનિધિ તરફથી) : સૌરાષ્ટ્ર ટ્રસ્ટના ટ્રસ્ટી અને જાણીતા ધારાશાસ્ત્રી પ્રીતિબેન મહેતાનો સમાવેશ લીગલ સામયિક `ઇન્ડિયા બિઝનેસ લો જર્નલ' (આઈબીએલજે)ની વર્ષ 2026 માટે ઉત્કૃષ્ટ ભારતીય વકીલોની  યાદીમાં `આઈકોન' તરીકે કરવામાં આવ્યો છે. મેગેઝિનની 2026 માટેના `એ લિસ્ટ'માં ટોચના ધારાશાસ્ત્રીઓનો સમાવેશ કરવામાં આવ્યો છે, જેઓ ભારતીય તથા આંતરરાષ્ટ્રીય ફર્મ્ઝ સાથે સંકળાયેલા હોય અને ભારત કેન્દ્રિત પ્રવૃત્તિઓમાં કાર્યરત હોય. `હૂઝ હૂ લીગલ' / `લેક્સોલોજી ઇન્ડેક્સ' નામના વધુ એક આંતરરાષ્ટ્રીય પ્રકાશને પ્રીતિબેનને છેલ્લા એક દાયકા કરતાં વધુ સમયથી ફ્રેન્ચાઈઝિંગમાં વિશ્વના અગ્રણી પ્રેક્ટિશનર્સમાં એક તરીકે બિરદાવ્યાં છે. છેલ્લા ચાર દાયકા  કરતાં વધુ સમયથી પ્રીતિબેન કાંગા એન્ડ કંપનીમાં સિનિયર પાર્ટનર તરીકે કાર્યરત છે અને મર્જર એન્ડ એક્વિઝિશન, પ્રાઈવેટ ઈક્વિટી ઈન્વેસ્ટમેન્ટ્સ તથા કોર્પોરેટ લો તેમની પ્રેક્ટિસનાં ક્ષેત્રો છે. તેઓ મૂળ માંડવી-કચ્છના છે. પ્રીતિબેન પોતાની સફળતાનો શ્રેય પિતા સ્વ. ડી.એમ. પોપટને આપે છે, જેઓ મેસર્સ મુલ્લા એન્ડ મુલ્લા અને ક્રેગી બ્લન્ટ એન્ડ કેરોમાં સિનિયર પાર્ટનર હતા. આ ક્ષેત્રમાં શરૂઆતની ટ્રાનિંગ તેમણે પિતા પાસે મેળવી હતી. આગળ જતાં, પિતાતુલ્ય સિનિયર પાર્ટનર સ્વ. એમ.એલ. ભક્તા સાથે કામ કરી તેમની પાસેથી પણ પ્રશિક્ષણ મેળવ્યું હતું. આ બંને ધારાશાસ્ત્રી પોતાના વ્યવસાયના મહારથીઓ ગણાય છે. આ યાદીમાં સ્થાન જાળવી રાખવા અંગે પ્રતિક્રિયા આપતાં પ્રીતિબેને જણાવ્યું હતું કે, `અહીં સુધી પહોંચવું સરળ નહોતું અને આ રેન્કિંગ જાળવી રાખવામાં દર વર્ષે નવા પડકારો સામે આવે છે. આમ છતાં, સાતત્યપૂર્વક આ યાદીમાં સ્થાન મળે છે એનો સંતોષ છે. કાંગા એન્ડ કંપનીના સિનિયર પાર્ટનર તરીકે મળેલી આ સ્વીકૃતિ માટે હું અત્યંત કૃતજ્ઞ છું. અમારા ક્લાયન્ટ્સનો આના માટે હાર્દિક આભાર માનું છું.' પ્રીતિબેન રોટરી ક્લબ ઓફ બોમ્બેના પાસ્ટ પ્રેસિડન્ટ છે, જ્યાં તેમનો મુંબઈ તેમજ મહારાષ્ટ્રના ગ્રામીણ વિસ્તારોમાં વિવિધ સામાજિક સેવા પ્રોજેક્ટ્સમાં સક્રિયપણે સહભાગ રહ્યો છે. પ્રીતિબેન તાજેતરમાં પરિવાર સાથે કચ્છની મુલાકાતે આવ્યાં હતાં.