શું અડધું વિશ્વ ઓફલાઈન થઈ જશે ?

તહેરાન, તા. 23 : ઈરાન અને ઈઝરાયલ-અમેરિકા વચ્ચે ચાલી રહેલા સંઘર્ષ અને દિન પ્રતિદિન બદલાતા ઘટનાક્રમ વચ્ચે ઈરાને સમુદ્રની અંદર રહેલા ઈન્ટરનેટ કેબલ નષ્ટ કરવાની ધમકી આપી છે. આ ધમકીથી વિશ્વભરમાં ઉચાટ ફેલાયો છે. ઈરાન યુદ્ધ પહેલાથી જ તેલ અને ગેસ પુરવઠાને અસર કરી ચૂક્યું છે અને હવે ઇન્ટરનેટ પણ જોખમમાં છે. એક મીડિયા હેવાલ મુજબ, ઈરાને હવે હોર્મુઝ સ્ટ્રેટમાંથી પસાર થતા ઇન્ટરનેટ કેબલને નિશાન બનાવવાની ધમકી આપી છે, જેનાથી ઇરાદાપૂર્વક અથવા આકસ્મિક નુકસાન થવાની સંભાવના છે. ઈરાનની આઈઆરજીસી સાથે સંકળાયેલી સમાચાર એજન્સીના હેવાલમાં જણાવાયું છે કે, હોર્મુઝ સ્ટ્રેટ માત્ર ઊર્જા ચોકી જ નથી, પરંતુ યુએઈ, કતાર, બહેરીન, કુવૈત અને સાઉદી અરેબિયા જેવા દેશોને જોડતા કેબલ માટે એક મહત્ત્વપૂર્ણ કોરિડોર પણ છે. અહેવાલમાં જણાવાયું છે કે, હોર્મુઝ સ્ટ્રેટમાંથી ઘણી મોટી કેબલ સિસ્ટમો પસાર થાય છે અને ઘણા દેશો દરિયાઈ ઇન્ટરનેટ એક્સેસ માટે ઈરાન પર આધાર રાખે છે. આ કેબલ, લેન્ડિંગ સ્ટેશન અને ડેટા હબનો ઉપયોગ યુદ્ધ દરમિયાન દબાણ લાવવા માટે થઈ શકે છે. યુએઈ અને બહેરીન જેવા દેશોમાં ડેટા સેન્ટર ઈન્ફ્રાસ્ટ્રક્ચરનો પણ ઉલ્લેખ છે, જેનું નુકસાન અર્થતંત્ર અને સંદેશા વ્યવહાર પ્રણાલી બંને માટે જોખમી બની શકે છે. હોર્મુઝ સ્ટ્રેટમાંથી પસાર થતા ઇન્ટરનેટ કેબલ ઇન્ટરનેટ ટ્રાફિકનો નોંધપાત્ર હિસ્સો સંભાળે છે. સ્ટ્રેટના ઘણા સ્થળોએ સમુદ્રની ઊંડાઈ ફક્ત 200 ફૂટ છે. આ ઊંડાઈ પર નાખેલા ઇન્ટરનેટ કેબલ સુધી ઈરાન ખૂબ જ સરળતાથી પહોંચી શકે છે અને નુકસાન પહોંચાડે છે. જો તે આકસ્મિક રીતે નષ્ટ થાય છે, તો નુકસાન નોંધપાત્ર હશે. યુદ્ધને કારણે તેમને સમારકામ કરવામાં ઘણો સમય લાગી શકે છે. યુદ્ધને કારણે સમારકામ કરી રહેલા જહાજો માટે આ સમયે હોર્મુઝ સ્ટ્રેટ સુધી પહોંચવું જોખમી બની શકે છે. નોંધનીય છે કે, ઈરાનની ધમકીથી ઈન્ટરનેટ કેબલ્સને નુકસાન થવાનું જોખમ વધી ગયું છે. ઈરાને યુદ્ધમાં પહેલાથી જ અનેક ડિજિટલ ઈન્ફ્રાસ્ટ્રક્ચરને નિશાન બનાવ્યું છે. ઈરાને ડ્રોન હુમલામાં યુએઈ અને બહેરીનમાં એમેઝોન વેબ સર્વિસીસ સેન્ટરોને નુકસાન પહોંચાડ્યું હતું.