• બુધવાર, 22 મે, 2024

પતંજલિની માફી મંજૂર નથી : સુપ્રીમ

નવી દિલ્હી, તા. 10 : સુપ્રીમ કોર્ટે બુધવારે પતંજલિની વિવાદાસ્પદ જાહેરાત કેસમાં બાબા રામદેવ અને બાલકૃષ્ણની બીજી માફી પણ ફગાવી દીધી હતી. જસ્ટિસ હિમા કોહલી અને જસ્ટિસ અમાનતુલ્લાની બેંચે પતંજલિના વકીલો વિપિન સાંઘી અને મુકુલ રોહતગીને કહ્યું કે, તમે જાણીજોઈને કોર્ટના આદેશનું ઉલ્લંઘન કર્યું છે, કાર્યવાહી માટે તૈયાર રહો. ઉત્તરાખંડ સરકાર વતી ધ્રુવ મહેતા અને વંશજા શુક્લાએ એફિડેવિટનું વાંચન કર્યું હતું. સુપ્રીમ કોર્ટે કહ્યું, કેન્દ્ર તરફથી પત્ર આવ્યો છે કે, તમારી પાસે કેસ છે. કાયદાનું પાલન કરો. આવું વખત થયું. વારંવાર લાયસન્સ નિરીક્ષક મૌન રહ્યા. પછી જેઓ આવ્યા તેમણે પણ આવું કર્યું. ત્રણેય અધિકારીને તાત્કાલિક સસ્પેન્ડ કરવા જોઈએ. કેસની આગામી સુનાવણી 16 એપ્રિલે થશે. પહેલા બીજી એપ્રિલે બેંચમાં થયેલી સુનાવણી દરમ્યાન પતંજલિ વતી માફી માગવામાં આવી હતી. તે દિવસે પણ બેંચે પતંજલિને ઠપકો આપ્યો હતો અને કહ્યું હતું કે, માફી માત્ર પરિપૂર્ણતા ખાતર છે. તમારામાં ક્ષમાની લાગણી નથી. પછી કોર્ટે સુનાવણીની તારીખ 10 એપ્રિલ નક્કી કરી હતી. નવમી એપ્રિલે, સુનાવણીના એક દિવસ પહેલાં બાબા રામદેવ અને પતંજલિ આયુર્વેદના મેનાજિંગ ડિરેક્ટર આચાર્ય બાલકૃષ્ણે એક નવું સોગંદનામું દાખલ કર્યું, જેમાં પતંજલિએ બિનશરતી માફી માગી હતી અને કહ્યું હતું કે, તેમને ભૂલ માટે પસ્તાવો છે અને તે ફરીથી નહીં થાય. સુપ્રીમ કોર્ટ 17 ઓગસ્ટ, 2022ના ઈન્ડિયન મેડિકલ એસોસિયેશન (આઈએમએ) દ્વારા દાખલ કરવામાં આવેલી અરજી પર સુનાવણી કરી રહી છે, તેમાં કહેવામાં આવ્યું છે કે, પતંજલિએ કોવિડ રસીકરણ અને એલોપેથી વિરુદ્ધ નકારાત્મક પ્રચાર કર્યો હતો. તે સમયે, તેમણે પોતાની આયુર્વેદિક દવાઓથી કેટલાક રોગોનો ઇલાજ કરવાનો ખોટો દાવો કર્યો.

ઇ-પેપરના નવા શુલ્ક

Panchang