વિશેષ પ્રતિનિધિ તરફથી : નવી દિલ્હી, તા. 2 : દેશના રાજકારણમાં
બુધવારનો દિવસ અનેક મોરચે હલચલથી ભરેલો રહ્યો. એક તરફ મતદાર યાદીના ખાસ સઘન પુન:નિરીક્ષણ
(એસઆઇઆર) અંગે શાસક પક્ષ અને વિપક્ષ આમને-સામને જોવા મળ્યા, તો બીજી તરફ 2029ની લોકસભા ચૂંટણીની તૈયારીઓના
સંકેતો પણ મળવા લાગ્યા છે. તમિલનાડુમાં ટીવીકે પ્રમુખ વિજયને વડા પ્રધાન પદના સંભવિત
ચહેરા તરીકે રજૂ કરવાની ચર્ચાએ રાજકીય ગલિયારાઓમાં નવી ચર્ચા જગાવી છે. જ્યારે જમ્મુ-કાશ્મીરમાં
રાજ્યનો દરજ્જો પુન:સ્થાપિત કરવાનો મુદ્દો ફરી રાજકીય કેન્દ્રમાં આવ્યો છે. ઉત્તર પ્રદેશમાં
એઆઇએમઆઇએમના રાષ્ટ્રીય પ્રવક્તા સૈયદ અસીમ વકારનું કૉંગ્રેસમાં જોડાવું એ પણ દિવસના
મોટા રાજકીય ઘટનાક્રમોમાં સામેલ રહ્યું.
મહારાષ્ટ્રમાં એસઆઇઆર પર ઘમસાણ
મહારાષ્ટ્રની મતદાર યાદીને લઈને કૉંગ્રેસ અને ચૂંટણી પંચ વચ્ચે
ખેંચતાણ બુધવારે વધુ તીવ્ર બનતી જણાઈ. લોકસભામાં વિપક્ષના નેતા રાહુલ ગાંધીએ મતદાર
યાદીમાં મોટા પાયે સંભવિત ફેરફારો અંગે સવાલો ઉઠાવ્યા. અહેવાલોમાં આશરે 2.07 કરોડ મતદારો સાથે જોડાયેલો
આંકડો ચર્ચામાં આવ્યો છે. જોકે, ચૂંટણી
પંચ તરફથી સ્પષ્ટતા કરવામાં આવી છે કે આ આંકડાને આખરી રીતે હટાવનારા મતદારોની સંખ્યા
તરીકે ન જોવો જોઈએ. આમ છતાં, વિપક્ષે એસઆઇઆરની પ્રક્રિયા અને
તેની સંભવિત અસરો અંગે ચિંતા વ્યક્ત કરી છે. વરિષ્ઠ વકીલ કપિલ સિબ્બલે પણ સુપ્રીમ કોર્ટ
સમક્ષ મોટા પાયે નામો હટાવવા પર રોક લગાવવાની માંગ કરી છે. આ સમગ્ર વિવાદે ફરી એકવાર
ચૂંટણી પ્રક્રિયાની પારદર્શિતા અને મતદાર યાદીની શુદ્ધતાને રાજકીય ચર્ચાના કેન્દ્રમાં
લાવી દીધી છે.
જમ્મુ-કાશ્મીરમાં ફરી આમને-સામને ભાજપ અને નેશનલ કૉન્ફરન્સ
જમ્મુ-કાશ્મીરમાં રાજ્યનો દરજ્જો પુન:સ્થાપિત કરવાનો મુદ્દો
ફરી એકવાર રાજકીય ચર્ચાના કેન્દ્રમાં રહ્યો. ભાજપ અને નેશનલ કૉન્ફરન્સ વચ્ચેનો ટકરાવ
બુધવારે રસ્તા પર પહોંચતો જોવા મળ્યો.
