મોથાળામાં તો ડાયવર્ઝન પણ તૂટયું

મોથાળા, તા. 7 : અબડાસાનાં મોથાળા ગામને ફરતે ત્રણેય નદી ઘેરી વળતાં પ્રવેશવાના રસ્તા બંધ થઈ ગયા હતા, તેમાંય મુખ્ય પાપડીનું ડાયવર્ઝન પણ તૂટી જતાં વાહન વ્યવહાર બંધ થઈ ગયો હતો. આ ગામમાં પ્રવેશવા માટે 30 વર્ષ પછી માંડ પુલ બન્યો હતો, તે પુલ ગયાં વર્ષે પહેલા જ વરસાદમાં તૂટી જતાં હંગામી ધોરણે ડાયવર્ઝન કરવામાં આવ્યું હતું, પણ આજે સવારે ભારે વરસાદને પગલે આ ડાયવર્ઝન પણ તૂટી જતાં રસ્તો જ બંધ થઈ ગયો હતો. એક બાજુ ડાયવર્ઝનનો ભાગ તૂટી ગયો. બીજો રસ્તો પાપડી ઉપરથી પાણીનો ભારે પ્રવાહ હોવાથી વાહનો પસાર થઈ શકે તેમ ન હતો. કેમ કે, બાલાચોડ ડેમ ઓગની જતાં ઓગનનું પાણી જોશભેર વહેતું થયું હતું.