ન્યૂયોર્ક, તા. 10 : ન્યૂયોર્કના નાસાઉ કાઉન્ટિ સ્ટેડિયમની કઠિન પીચ પર વરસાદગ્રસ્ત મેચમાં ભારતે પાકિસ્તાન સામે છ રને યાદગાર વિજય પ્રાપ્ત કર્યો હતો. આ લો સ્કોરિંગ મેચમાં ટીમ ઇન્ડિયાએ અનેક વિક્રમ રચ્યા હતા. રોહિતની ટીમે 119 રનના તેમના સ્કોરનો આબાદ બચાવ કરીને જીત મેળવી હતી. આ મેચમાં થયેલ કેટલાક રેકોર્ડ પર નજર કરીએ. ટી-20 વર્લ્ડકપમાં ભારતે પહેલીવાર તેના સૌથી ઓછા 119 રનના સ્કોરનો બચાવ કર્યો હતો. આ પહેલાં ભારતે 2016માં ઝિમ્બાબ્વે સામે 139 રનના સ્કોરનો બચાવ કર્યો હતો. 120 રનનું લક્ષ્ય ટી-20 ફોર્મેટમાં પાકિસ્તાન માટે બીજું ન્યૂનતમ લક્ષ્ય છે. જે હાંસલ કરવામાં તે અસફળ રહ્યંy. આ પહેલાં પાકિસ્તાન 2021માં ઝિમ્બાબ્વે વિરુદ્ધ 119 રનનું લક્ષ્ય હાંસલ કરી શક્યું ન હતું. ટી-20 વિશ્વકપમાં ભારતે પાકિસ્તાનને હવે સાતમી વખત હાર આપી છે. પાક. ટીમને એકમાત્ર જીત 2021ના ટી-20 વિશ્વકપમાં મેળવી હતી. વર્લ્ડકપમાં કોઈ ટીમ સામે સૌથી વધુ જીતનો આ રેકોર્ડ ભારતીય ટીમનાં નામે છે. પાક. ટીમને અંતિમ 8 ઓવરમાં 48 રનની જરૂર હતી અને 8 વિકેટ હાથમાં હતી. આમ છતાં અંતમાં તેની છ રને હાર થઈ હતી. આ પહેલાં ઓસ્ટ્રેલિયા અંતિમ 8 ઓવરમાં ઇંગ્લેન્ડ સામે બાવન રન કરી શકી ન હતી. ટી-20 વિશ્વકપમાં એવું છઠ્ઠીવાર થયું છે કે કોઈ ટીમ ઓલઆઉટ થવા છતાં મેચ જીતી હોય. ભારતે ટી-20 વર્લ્ડકપમાં ઓલઆઉટ થયા પછી પહેલીવાર મેચ જીતી છે. 2014 બાદ ભારત-પાકિસ્તાન વચ્ચે કુલ 8 ટી-20 ઇન્ટરનેશનલ મેચ રમાયા છે. આ તમામ 8 મેચમાં ટોસ જીતનાર ટીમે પહેલા બોલિંગ પસંદ કરી છે. જેમાં સાત મેચમાં તેનો વિજય થયો છે, પણ રવિવારે પાકિસ્તાને ટોસ જીતીને બોલિંગ પસંદ કરી અને હાર સહન કરી.
