મમતા ધમકી કોને આપે છે?

મમતા બેનરજીએ મોદી સરકાર અને ભાજપને ખુલ્લી ધમકી આપી છે : `બંગાળના લોકોને નુકસાન - ઇજા પહોંચાડાશે તો તે મારા ઉપરનો હુમલો ગણાશે. બંગાળ વિધાનસભાની ચૂંટણી પછી હું દેશભરમાં - ખૂણેખૂણે ફરી વળીશ અને દેશને હચમચાવી દઈશ.' મમતાજી કહેવા શું માગે છે? વિધાનસભાની ચૂંટણીમાં ભાજપ જીતી જાય તો લોકોને `ઇજા' પહોંચી ગણાશે? કે પછી મમતાનો અહમ્ ઘવાશે? આખા દેશને હચમચાવી નાખવાની શક્તિ હોવાની પણ શેખી કરી રહ્યાં છે! પંજાબના અલગતાવાદીઓ જેવી ભાષા બોલી રહ્યા છે! પણ આ એમનો સ્વભાવ છે. ભૂતકાળમાં આવકવેરા અને ઇડીની ટીમ કોલકાતા ગઈ ત્યારે સ્થાનિક પોલીસ તંત્રે મમતા સરકારના આદેશ મુજબ કેન્દ્રીય સંસ્થાઓની ટીમને પડકારીને ઘેરાબંધી કરી હતી. કેન્દ્ર સરકારને ખબર મળતાં વિશેષ વિમાન દ્વારા રક્ષણ મોકલવાની નોબત આવી હતી. કેન્દ્ર સરકાર સામે રસ્તા ઉપર ધરણાં કરીને સૂત્રો પણ પોકાર્યાં છે! મનમોહન સરકારમાં એમના પક્ષના નેતા - દિનેશભાઈ ત્રિવેદી રેલવેપ્રધાન હતા. બજેટમાં એમની કેટલીક દરખાસ્તોનો વિરોધ કરીને મનમોહન ઉપર દબાણ કર્યું. આખરે દિનેશભાઈએ રાજીનામું આપી દીધું! આમ `બંગાળની વાઘણ' હોવાનું અભિમાન છે પણ વાસ્તવમાં મહારાણીનું મિથ્યાભિમાન છે! ચૂંટણી દરમિયાન - હિંસાચાર શરૂ થાય અને કાયદો - વ્યવસ્થા કથળે તો કેન્દ્ર સરકારે અનિવાર્ય નિર્ણય લેવા જ પડશે. લોકતંત્રના બચાવ માટે ચૂંટણી પ્રક્રિયામાં અવરોધ ચલાવી શકાય નહીં. તેથી ધમકીનાં પરિણામ તો મમતા જાણતાં જ હશે. આવતીકાલથી શરૂ થતાં સંસદના સત્રમાં મમતા અને અન્ય વિપક્ષોના `પ્લાન'ની ઝલક જોવા મળશે. ધાંધલ ધમાલમાં `એકતા' હશે પણ ચૂંટણીમાં ભાજપ સામે `એકતા' હશે? રાહુલ ગાંધી પણ દેશમાં એકતાને બદલે અરાજકતા ફેલાવવા માગે છે!  બંગાળમાં મતદાર યાદીઓની ફેરતપાસ - ચકાસણી થઈ રહી છે, તેની સામે વિરોધ કરીને મમતાદીદી ઊકળી ઊઠયાં છે. એમની ધમકી માત્ર મોદી સરકારને નહીં, સમગ્ર રાષ્ટ્ર અને લોકતંત્રને છે! ધમકી પાછળ એમનો આત્મવિશ્વાસ નહીં, નિરાશા - નિશ્ચિત નિષ્ફળતાની હતાશા છે! દેશભરમાં `ફરી વળવા'ની રાજકીય યાત્રા છે : વિપક્ષી નેતાગીરી માટે રાહુલ ગાંધી સામે પડકાર છે. તેઓ કહે છે કે, `િબહારમાં વિપક્ષી નેતાઓ કેન્દ્ર સરકારની રાજરમત પકડી શક્યા નહીં પણ બંગાળમાં અમે જાણીએ છીએ અને પ્રતિકાર કરીશું. બિહારમાં ભાજપે ઘૂસણખોરોનો મુદ્દો કેન્દ્રમાં રાખ્યો અને સફળ થયા છે. બંગાળમાં અમે જવાબ આપીશું.' બંગાળ ઉપરાંત ગુજરાત અને કેન્દ્રમાં પણ ભાજપ સત્તા ગુમાવશે એમ મમતા કહે છે. `તમને શું ચૂંટણીપંચ સત્તા અપાવશે?' એવો પ્રશ્ન કરીને આક્ષેપ કરે છે કે, ચૂંટણીપંચ કેન્દ્ર સરકારના આદેશ મુજબ કામ કરે છે. બંગાળમાં મતદારયાદી ચકાસવા માટે માત્ર બે મહિનાની મુદ્દત શા માટે આપી? ત્રણ વર્ષથી તૈયારી કેમ કરી નહીં? ઘૂસણખોરો અંગે મમતા કહે છે કે, ગુજરાત - મહારાષ્ટ્ર જેવાં ભાજપ રાજ્યોમાં સરકારોએ ઘૂસણખોરો કેમ ચલાવી લીધા? બાંગલાદેશીઓ બંગાળમાં પ્રવેશી રહ્યાં છે તો ભારતીય સીમા સુરક્ષાદળ શું કરે છે? આ પ્રશ્નો અને આક્ષેપો થાય છે પણ અત્યારે બંગાળની સરહદેથી બાંગલાદેશમાં પાછા ફરવા માટે આવા લોકોનો ધસારો થઈ રહ્યો છે તે મમતા જોતાં-જાણતાં નથી? 1971માં બાંગલાદેશની આઝાદી માટે ભારતે લશ્કરી મદદ કરી કારણ કે, પાકિસ્તાની અત્યાચારથી બચવા માટે આપણી સરહદેથી નિરાશ્રિતોનો ધસારો થયો હતો. આખરે ભારતમાં આશ્રય મળ્યો અને કાયમી વસાહતી થઈ ગયા. બંગાળમાંથી દેશભરમાં ફેલાઈ ગયા. પરિણામે કાયદો-વ્યવસ્થાની સમસ્યા ગંભીર બની. ઉત્તરાખંડમાં તો સરકારી ભૂમિ ઉપર ગેરકાયદે મસ્જિદ બાંધવામાં આવી. આખરે સ્થાનિક લોકોનો વિરોધ ઊઠયો. ઘૂસણખોરી આસામમાં ફકરુદ્દીન અલી અહમદ હતા. ત્યારથી શરૂ થઈ હતી પણ વખત જતાં ઘૂસણખોરોની વોટ બેંક શરૂ થઈ. આધાર કાર્ડ અને ઇલેક્શનનાં ઓળખપત્રો પણ મળવા લાગ્યાં - બંગાળમાં મમતાદીદીની `દાદીગીરી' આ વોટ બેંકના કારણે છે અને હવે `બેંક' રહી નથી તેથી ધૂંધવાયાં છે. ચૂંટણીપંચના અધ્યક્ષ કહે છે, ચૂંટણી - મતદાન શુદ્ધ હોવું જોઈએ. આ માટે મતદારો પણ ભારતના નાગરિકો હોવા જોઈએ. ઘૂસણખોરોની વોટ બેંકથી ચૂંટણી અને લોકતંત્રની `ચોરી' રોકવી જ જોઈએ. મતદાતાઓની યાદીની ચકાસણી થઈ રહી છે, તેની સામે કેરળ, તામિલનાડુ અને બંગાળે સુપ્રીમ કોર્ટને ફરિયાદ કરી છે ત્યારે સુપ્રીમ કોર્ટે સ્પષ્ટ કહ્યું છે કે, આવી ચકાસણી કરવાની ફરજ અને સત્તા ચૂંટણીપંચની છે. ક્યાંય ક્ષતિ હોય તો સુપ્રીમ કોર્ટ સુધારો સૂચવી શકે પણ પંચની કાર્યવાહી રોકી શકાય નહીં. વાસ્તવમાં ભારતમાં ચૂંટણી પ્રક્રિયા અને મતદાન જોવા માટે વિદેશી પ્રતિનિધિમંડળો આવતાં હોય છે. ભારતીય ચૂંટણીપંચના અધ્યક્ષ - કમિશનર જ્ઞાનેશ કુમારની નિયુક્તિ હવે ઇન્ટરનેશનલ ઇન્સ્ટિટયૂટ ફોર ડેમોક્રસી એન્ડ ઇલેક્ટોરલ આસિસ્ટન્સના અધ્યક્ષપદે થઈ છે. ભારતના લોકતંત્ર અને નિષ્પક્ષ ચૂંટણીનો આ પુરાવો અને સર્ટિફિકેટ છે પણ વિપક્ષો પોતાની નિષ્ફળતા ઢાંકવા માટે વોટ-ચોરીના આક્ષેપ કરે છે! પંચના સભ્યોને ધાક-ધમકી અપાય છે કે, અમે સત્તા ઉપર આવીએ પછી તમને કોણ બચાવશે? વિપક્ષી નેતાઓ - રાહુલ ગાંધી અને અખિલેશ યાદવથી મમતા બેનરજી સુધીના - જનતાનો વિશ્વાસ મેળવી શકતા નથી. કારણ કે, એમનાં હૈયે જનહિત નથી માત્ર સત્તાનો સ્વાર્થ છે. વિપક્ષી નેતાઓ પ્રામાણિક હોય તો એમણે પંચ ઉપર રાજકીય આક્ષેપ કરવાને બદલે સહકાર આપવો જોઈએ. હાથમાં સંવિધાનની નકલ (નકલી?) હલાવીને સંવિધાન બચાવોના હોકારા - દેકારાને બદલે, લોકતંત્રને બદનામ કરવાને બદલે સક્રિય, હકારાત્મક વિપક્ષની ફરજ બજાવવી જોઈએ. સત્તા મેળવવા માટે આ એકમાત્ર સફળ માર્ગ છે. બંગાળમાં - અને તે પછી ગુજરાત સહિત અન્ય રાજ્યોમાં પંચ દ્વારા નિમાયેલા બૂથ લેવલ ઓફિસરોની આત્મહત્યાના બનાવ બન્યા છે. પંચના કામના દબાણના કારણે આત્મહત્યા થતી હોવાનો આક્ષેપ છે પણ હત્યાનાં કારણોનો તપાસ અહેવાલ આવે તેની રાહ જોવી જોઈએ. રાહુલ ગાંધી કદાચ નહીં જાણતા હોય પણ મમતાજીએ યાદ તાજી કરવી જોઈએ કે 1977 સુધી દરેક ચૂંટણીમાં રાજકીય કાર્યકરોની પદ્ધતિસર હત્યાઓ થતી હતી. મતગણતરી કરતા કર્મચારીઓ ઉપર પણ - રાયબરેલીમાં હુમલા થયા હતા! હવે ચૂંટણી હિંસા - મુક્ત તો થઈ છે ને?અત્યારે મમતાદીદી રાહુલ ગાંધી સાથે સ્પર્ધા કરી રહ્યાં છે - વોટ ચોરીના આક્ષેપ અને પંચના `રાજકીય વ્યૂહ'ના આક્ષેપ થઈ રહ્યાં છે. હકીકતમાં બંગાળમાં જ્યારે માર્ક્સવાદીઓની સત્તા હતી ત્યારે દાદા-દાદીગીરી નહીં પણ ગુંડાગીર્દી હતી. ખુદ મમતાજીએ લોકસભામાં ડાબેરીઓ ઉપર આક્ષેપો કરીને બળાપા કાઢયા હતા! બાંગલાદેશીઓની ઘૂસણખોરી રોકવાની રજૂઆત કરી હતી. વર્ષ 2005માં એમણે લોકસભામાં ફરિયાદ કરી હતી કે, માર્ક્સવાદી રાજ્ય સરકાર બાંગલાદેશીઓને બંગાળમાં ઘુસાડી રહી છે : જાણે લાલ જાજમ પાથરી છે! ભારતીય મતદારોને સરકારી ઓળખપત્રો આપવાં જોઈએ જેથી બાંગલાદેશીઓ મતદાર બની જાય નહીં! લોકસભામાં આ મુદ્દો 14 વખત ઉઠાવીને ચર્ચાની માગણી કરી પણ સ્પીકરે મંજૂરી નહીં આપતાં ફાઇલ સ્પીકર સામે ફેંકીને વોક આઉટ કરી ગયાં હતાં. મમતાજીની મેમરી તો સારી હશે જ.