કૃષિક્ષેત્રે
હરિતક્રાંતિ, મત્સ્યોદ્યોગ ક્ષેત્રે બ્લૂ ક્રાંતિ બાદ હવે ગુજરાતમાં રમતક્રાંતિ
થશે. ગુજરાત અને સમગ્ર દેશ માટે ગૌરવ કહી શકાય તેવી આ ઘોષણા બુધવારે સાંજે થઈ. ગ્લાસગોમાં
યોજાયેલી બેઠકમાં નિર્ણય થયો કે, 2030માં
યોજાનારી કોમનવેલ્થ ગેમનું યજમાન ગુજરાતનું અમદાવાદ બનશે. ગુજરાતની કુંડળી પણ કેવી
બળવાન અને કેવો સુયોગ? અહીં કોમનવેલ્થ રમતોત્સવની શતાબ્દી
ઊજવાશે. રમતક્ષેત્રે આ જાહેરાતને અંતરથી વધાવી છે. આખાં રાજ્યના રમત સંકુલો,
વિવિધ રમતના ખેલાડીઓ, કોચ સહિતના લોકોમાં એક ઉત્સાહ
સંચારિત થયો છે. એવો અભિપ્રાય છે કે, ગુજરાતનું `સ્પોર્ટસ કલ્ચર'- રમતનો આખો માહોલ
બદલાઈ જશે. વડાપ્રધાનનો મનોરથ છે કે, 2036માં
ભારત ઓલિમ્પિક રમતોનું યજમાન બને, તજજ્ઞો કહે છે આ કોમનવેલ્થ રમત ઓલિમ્પિક
તરફની યાત્રાનું મક્કમ ડગ બનશે. 2010માં
ભારતમાં કોમનવેલ્થ રમતોત્સવ થયો હતો. બરાબર બે દાયકા બાદ ભારતને તેના યજમાન બનવાનો
અવસર પ્રાપ્ત થયો છે અને આ વખતે તે ગુજરાતમાં યોજાશે. કોમનવેલ્થને લીધે અમદાવાદના વૈશ્વિક
વિસ્તરણને વિશેષ વેગ મળશે. આ શહેર મિલોને લીધે, ઉદ્યોગોને લીધે,
ગાંધીજીને લીધે વિશ્વવિખ્યાત છે. કોમનવેલ્થ રમત તેમાં મોટું ઊમેરણ કરશે.
અમદાવાદના-ગુજરાતના અર્થતંત્ર માટે આ મોટી ઘટના ગણાશે. હોટેલ ઉદ્યોગથી લઈને પરિવહન
સહિતના ક્ષેત્રો માટે તકનું આભ ઊઘડયું એમ કહી શકાય. વિશાળ પાયા ઉપર રોજગારીનું સર્જન
થશે. જો કે, આ ફક્ત આર્થિક રીતે મૂલવવાની બાબત પણ નથી. આ રમતોત્સવમાં
72 દેશના રમતવીરો ભાગ લેતા હોય છે.
2010માં ભારતમાં નવી દિલ્હી ખાતે કોમનવેલ્થ ગેમ્સ રમાઈ
ત્યારે 70 હજાર કરોડનો ખર્ચ થયો હતો. અમદાવાદમાં
યોજાનાર કોમનવેલ્થ ગેમનું વિશેષ મહત્ત્વ રહેશે. કારણ કે, તે આ રમતોત્સવના શતાબ્દી વર્ષે તેનું આયોજન થઈ રહ્યું છે. અમદાવાદને ભવિષ્યમાં
ફાયદો થશે, તેનો નકશો એક રીતે બદલાશે તે વાત તો ખરી, પરંતુ અગત્યનું એ છે કે, આ શહેર છેલ્લા બે-અઢી દાયકામાં
એવી રીતે વિકસ્યું છે કે, આવા પ્રતિષ્ઠિત રમતોત્સવ માટે નાઈજીરિયાના
અજુબા શહેર પણ દાવેદારીમાં હતું, પરંતુ પસંદ અમદાવાદ થયું છે.
અમદાવાદમાં ઊભી થયેલી માળખાકીય સુવિધા, શહેરીકરણના સુદૃઢ આયોજને
પણ તેમાં ભાગ ભજવ્યો છે. વિશ્વસ્તરની હોટેલ, આધુનિક પરિવહન નગર
રચના સહિતનાં પાસાં અહીં અગત્યના છે. ગુજરાત રાષ્ટ્રનું `સ્પોર્ટસ કેપિટલ' બનશે. આંતરરાષ્ટ્રીય
આયોજન હોવા છતાં ગુજરાતના શહેરો-ગામોમાં પણ રમતનો એક વિશેષ માહોલ ઊભો થશે અને પરિણામે
યુવાપેઢી સ્પોર્ટસ તરફ આકર્ષાશે અને આગળ વધશે, રમતનાં માળખાં
અને તાલીમની ગુણવત્તા વધશે, આંતરરાષ્ટ્રીય સ્તરના કોચનો લાભ અહીં
મળશે તેવી ધારણાઓ કરવી અસ્થાને નથી. મુખ્યમંત્રી ભૂપેન્દ્ર પટેલે જેમ કહ્યું છે તેમ
ગુજરાત, અમદાવાદ માટે આ અપ્રતિમ ગૌરવની ક્ષણ છે. `િવકસિત ગુજરાતથી વિકસિત ભારતની સંકલ્પના વધારે મજબૂત
બનશે.' 2010નો કોમનવેલ્થ
રમતોત્સવ આર્થિક ગેરવહીવટને લીધે બહુ બદનામ થયો હતો, તેની અસર છેક
2014ની લોકસભાની
ચૂંટણી સુધી ચાલી હતી. આ પુનરાવર્તન ન થાય તે ખાસ જોવું પડશે.
