તીરંદાજીમાં રાષ્ટ્રીય સ્તરે રમ્યો માધાપરનો પ્રતિભાશાળી વિદ્યાર્થી

ભુજ, તા. 28 : માધાપરના શ્રીજી વિદ્યાલયમાં સાતમા ધોરણમાં અભ્યાસ કરતા અને એમ.એસ.વી. હાઈસ્કૂલ સંકુલમાં ટ્રેઈનિંગ મેળવતા પ્રતિભાશાળી છાત્ર વિરાજ દેવજીભાઈ ગોહિલે તીરંદાજીમાં વારાણસી ખાતેની રાષ્ટ્રીય સ્તરની અંડર 14ની સ્પર્ધામાં ભાગ લીધો હતો. વિરાજની સિદ્ધિ સવાઈ એટલા માટે છે કે તેના માતા-પિતા બંને દિવ્યાંગ છે પણ તેણે વિપરિત પરિસ્થિતિઓ વચ્ચે પણ પ્રતિભા ઝળકાવી છે. નડિયાદ ખાતે તાજેતરમાં રમાયેલી રાજ્યકક્ષાની શાળાકીય આર્ચરી સ્પર્ધામાં સુંદર પ્રદર્શન કરીને ચોથો નંબર મેળવીને વિરાજ નેશનલ લેવલની તીરંદાજીની રિકર્વ સ્પર્ધા માટે પસંદ થયો હતો અને માતા-પિતાને ગૌરવ અપાવ્યું હતું, તો પુત્ર તીરંદાજીની ખર્ચાળ રમતમાં આગળ વધી શકે એ માટે માતા-પિતાએ પણ કસર છોડી નથી. છેલ્લા દોઢેક વર્ષથી કોચ વિનય મિશ્રા સાથે બીરબલભાઈ અને વનિતાબેન પાસે ટ્રેઈનિંગ લઈ રહેલા વિરાજના માતા મંજુલાબેન અને પિતા દેવજીભાઈએ જણાવ્યું હતું કે, તેના દેખાવથી અમને એવી લાગણી થઈ કે અમે વિકલાંગ નથી. તેણે અમારાં સપનાં પૂરાં કર્યાં છે. માતા-પિતાએ વિરાજને તીરંદાજીમાં આગેકૂચ થઈ શકે એ માટે વિદેશથી મોંઘા તીરકામઠાનો સેટ લઈ દીધો છે. વિરાજ હવે ખેલકુંભની રાજ્ય સ્તરની સ્પર્ધા માટે નડિયાદ જવાનો છે. તેણે કોચ વિનયભાઈ સાથે ડો. ડી.એલ. ડાકી અને સ્કૂલના પ્રિન્સિપાલ ગોપીબેન ત્રિવેદીના સહયોગ અને માર્ગદર્શનનો ઉલ્લેખ કર્યો હતો.