કાલે રાંચીમાં આફ્રિકા વિરુદ્ધ પ્રથમ વન-ડે : રોહિત-કોહલીની જોડી પાસે રેકોર્ડની તક

રાંચી, તા. 28 : ભારત અને દ. આફ્રિકા વચ્ચેની 3 મેચની વન-ડે શ્રેણીનો પ્રારંભ રવિવારથી મહેન્દ્રસિંહ ધોનીના ગૃહનગર રાંચીથી શરૂ થશે. આ મેચમાં રોહિત શર્મા અને વિરાટ કોહલીની જોડી ઇતિહાસ રચશે. આ મેચ સાથે આ જોડી સૌથી વધુ એક સાથે ઇન્ટરનેશનલ મેચ રમનારી જોડી બની જશે. રોહિત-વિરાટની જોડી ભારતની દિગ્ગજ જોડી સચિન તેંડુલકર અને રાહુલ દ્રવિડનો રેકોર્ડ તોડશે. આ બન્નેએ એક સાથે 391 ઇન્ટરનેશનલ મેચ રમ્યા છે. હાલ રોહિત અને વિરાટની જોડીએ પણ આટલા જ ઈન્ટરનેશનલ મેચ રમ્યા છે. રવિવારે રાંચીમાં મેદાને પડવા સાથે તે નવો રેકોર્ડ બનાવશે. રાહુલ દ્રવિડે આ ઉપરાંત સૌરવ ગાંગુલી સાથે 369 ઇન્ટરનેશનલ મેચ રમી છે. જ્યારે સચિન અને અનિલ કુંબલેની જોડીએ 367 ઇન્ટરનેશનલ મેચ એક સાથે રમી છે. સચિન-સૌરવ એક સાથે 341 મેચ રમી ચૂકયા છે. જયારે કોહલી-જાડેજાના નામે 309 ઇન્ટરનેશનલ મેચ એક સાથે રમવાનો રેકોર્ડ છે. ભારત-આફ્રિકાનો પહેલો વન-ડે મેચ 30 નવેમ્બરે રાંચીમાં રમાયા પછી 3 ડિસેમ્બરે રાયપુરમાં રમાશે. બન્ને ટીમ વચ્ચે અત્યાર સુધીમાં કુલ 94 વન ડે ટક્કર થઇ છે. જેમાં આફ્રિકાના ખાતામાં પ1 જીત છે. તો ભારત પાસે 30 વિજય છે. 3 મેચ અનિર્ણિત રહી છે.