નવી દિલ્હી, તા. 10 : રાષ્ટ્રીય
રાજધાની દિલ્હીમાં એક મોટી ખેલ પરિયોજના બનાવવામાં આવી રહી છે. ખેલ મંત્રાલયના
શીર્ષ સૂત્રો અનુસાર જવાહરલાલ નેહરુ સ્ટેડિયમને તોડીને તેની જગ્યાએ નવું સ્પોર્ટસ
સિટી બનાવવામાં આવશે. આ પ્રોજેક્ટ 102 એકરના મોટા વિસ્તારમાં ફેલાયેલો
રહેશે. નવા સ્પોર્ટસ સિટીના નિર્માણ માટે કતર અને ઓસ્ટ્રેલિયા જેવા દેશોમાં ઉપયોગ
થતા આધુનિક મોડેલનું નિરિક્ષણ કરવામાં આવી રહ્યું છે. આ પરિયોજનાનો હેતુ દિલ્હીમાં
આંતરરાષ્ટ્રીય માપદંડ અનુસાર અત્યાધુકિ ઈન્ફ્રાસ્ટ્રક્ચર ઉભું કરવાનો છે. સૂત્રો
અનુસાર વર્તમાન સમયે જવાહરલાલ નેહરુ સ્ટેડિયમ જે જમીન ઉપર બન્યું છે તેને પૂરી
રીતે વિકસિત કરવામાં આવશે. નવી સ્પોર્ટસ સિટી 102 એકરમાં ફેલાયેલી રહેશે. જે દેશની
પ્રમુખ ખેલ સુવિધામાંથી એક બનશે. આ પ્રોજેક્ટનો હેતુ ખેલ માટે સમર્પિત એક એકિકૃત
અને આધુનિક કેન્દ્ર સ્થાપિત કરવાનો છે.
