નેશન્સ કપ લીગમાં પોર્ટુગલ ચેમ્પિયન

મ્યૂનિચ, તા. 9 : નેશન્સ કપ લીગના દિલધડક ફાઇનલ મુકાબલામાં પેનલ્ટી શૂટઆઉટમાં સ્પેન વિરુદ્ધ પોર્ટૂગલનો પ-3 ગોલથી યાદગાર વિજય થયો હતો. નિર્ધારિત સમયમાં બન્ને ટીમ 2-2 ગોલની બરાબરી પર રહી હતી. ખાસ વાત એ રહી હતી કે, કપ્તાન રોનાલ્ડોની ટીમે 1 ગોલ પાછળ રહ્યા બાદ જબરદસ્ત વાપસી કરીને સ્કોર 2-2ની બરાબરી પર લાવી દીધો હતો. બાદમાં મેચ એકસ્ટ્રા ટાઇમમાં પહોંચી હતી, જ્યાં બન્ને ટીમ ગોલ કરી શકી ન હતી. આથી પેનલ્ટી શૂટઆઉટનો સાહરો લેવામાં આવ્યો હતો, જેમાં શરૂઆતના ત્રણ ગોલ સુધી બન્ને ટીમ બરાબરી પર હતી. આ તકે પોર્ટૂગલના ગોલકીપર ડિએગો કોસ્ટાએ ચોથી પેનલ્ટી આબાદ બચાવી લીધી હતી. આ પછી રૂબેન નેવેસએ પાંચમી પેનલ્ટીમાં ગોલ કરીને પોર્ટૂગલની પ-3થી ઐતિહાસિક જીત નિશ્ચિત કરી હતી. પોર્ટૂગલની જીત બાદ રોનાલ્ડો તેના આંસુ ખાળી શક્યો ન હતો અને મેદાન પર જ રડી પડયો હતો. મેચની 61મી મિનિટે રોનાલ્ડોએ ગોલ કર્યો હતો. કારકિર્દીનો 138મો ગોલ કરીને તેણે પોર્ટૂગલની બરાબરી પર લાવી દીધું હતું. સ્પેન તરફથી 21મી મિનિટે માર્ટિન જેમિમેંડીએ અને 4પમી મિનિટે માઇકલ ઓયારજાબલે ગોલ કર્યાં હતા. જ્યારે પોર્ટૂગલ તરફથી પહેલો ગોલ 26મી મિનિટે નૂનો મેડિંસે ગોલ કર્યો હતો. આ 22 વર્ષીય ખેલાડી પ્લેયર ઓફ ધ ફાઇનલ જાહેર થયો હતો.