ભારતની અંતિમ સુરક્ષા ચોકી મુધાનને જોડતો રસ્તો બિસમાર

દયાપર (તા. લખપત), તા. 1 : ભારતની અંતિમ સીમા ચોકી મુધાનમાં કાર્યરત છે. રણ સરહદે આવેલ સીમા સુરક્ષા દળના કેમ્પ સુધી પહોંચવા સિયોત-મુધાન પાંચ કિ.મી.નો રસ્તો વર્ષોથી જર્જરિત છે, જે માર્ગ-મકાન વિભાગની નજરે આવતો નથી. મુધાનના અગ્રણી મનુભા જાડેજાએ કહ્યું હતું કે, મુધાન સરહદનું છેલ્લું ગામ છે, જેને શા માટે સુવિધાથી વંચિત રખાય છે ? મુધાનની બાજુમાં સીમા સુરક્ષા દળની ચોકીઓ આવેલી છે, જેથી સુરક્ષાની વ્યૂહાત્મક દૃષ્ટિએ પણ આ માર્ગ અતિમહત્ત્વનો છે. હાલમાં આ રસ્તો ગાડાવાટ જેવો બની ગયો છે. ઠેરઠેર ખાડા પડી ગયા છે, ડામર નીકળી ગયો છે. રસ્તાની મરંમત કરાય તેવી શ્રી જાડેજાએ માંગ કરી હતી.