ભુજના આશાપુરા રિંગ રોડ પર છાકટા બનેલા દ્વિચક્રીચાલક યુવાનો કોઇનો ભોગ લેશે તેવી ભીતિ

ભુજ, તા. 29 : શહેરના આશાપુરા રિંગ રોડ પર બેફામ-છાકટા બની ભારે ગતિ સાથે દ્વિચક્રી તેમજ કાર ચલાવનારાઓ પર અંકુશ આવે તેવી આસપાસના રહેવાસીઓ દ્વારા માંગ ઉઠી છે. કોઇ મોટી દુર્ઘટના ઘટે તે પહેલાં ટ્રાફિક પોલીસ આ માર્ગે ધાક બેસાડતી કાર્યવાહી કરે તેવી લોકલાગણી ફેલાઇ છે. ભુજમાં સવારથી રાત્રિ સુધી સતત ટ્રાફિકથી ધમધમતો આશાપુરા મંદિર રિંગ રોડ છેલ્લા કેટલાક સમયથી છાકટા બનેલા યુવાઓથી ત્રસ્ત બન્યો છે. આ માર્ગે એકપણ સ્પીડબ્રેકર ન હોવાથી જાણે રેસિંગ રોડ હોય તેમ ખાસ કરીને દ્વિચક્રી યુવાચાલકો ભારે ગતિ સાથે વાહનો આડેધડ હંકારી અનેક લોકોનાં જીવ તાળવે ચોંટાડી રહ્યા હોવાની લોકફરિયાદ ઊઠી છે. ભારે હોર્ન સતત વાગડવાની હેરાને તો આ માર્ગની શાંતિને હણી નાખી છે. સરપટ નાકાથી આશાપુરા રિંગ રોડ થઇ સ્વામિનારાયણ મંદિર તેમજ પાટવાડી જતા માર્ગે આ યુવાનો ગતિભેર વાહનો સામેથી આવતા સુજ્ઞ નાગરિકો પર જાણે અકસ્માત કરવાના ઇરાદાથી જ ધસી જાય છે અને જો સામેવાળો વ્યક્તિ કાંઇ કહે તો ત્વરિત સાગરિતોને બોલાવી મોટા ઝઘડાનું સ્વરૂપ આપવા તત્પર રહે છે. આ માર્ગે અનેક રહેણાક વિસ્તાર આવેલા છે. રહેવાસીઓને ઘરની ગલીમાંથી નીકળવામાં પણ અકસ્માતનો અને જીવ જવાનો ભય રહે છે. આ સમસ્યામાં માર્ગો પરની દુકાનો બહાર બેસનારાઓ માર્ગો પર આડેધડ દ્વિચક્રી ઊભા રાખી સમસ્યામાં વધારો કરી રહ્યા હોવાની પણ ફરિયાદો ઊઠી રહી છે. વળી, ફોર વ્હીલરો પણ ફૂટપાથ નજીક ગોઠવાતાં માર્ગ સાંકડો થવા સાથે લોકોને અકસ્માત થવાની શક્યતામાં વધારો કરી રહ્યા છે. દિવસો દિવસ આ માર્ગે વધતી જતી ઉપરોક્ત સમસ્યાને ધ્યાને લઇ નાની ટ્રાફિક પોલીસ ચોકી બનાવાઇ અને લોકોનાં જીવ અદ્ધર મૂકનારાઓ સામે કડક કાર્યવાહી કરાય તેવી લોકમાંગ ઉઠી છે.