મતદાર યાદી સુધારણા ઝુંબેશ અંગે માન્ય રાજકીય પક્ષો સાથે બેઠક યોજાઇ

ભુજ, તા. 28 : ચૂંટણી પંચના આદેશ અનુસાર કચ્છના છ વિધાનસભા વિસ્તારમાં તા. 1/1/2026ની લાયકાતની તારીખના સંદર્ભમાં ખાસ સઘન સુધારણા કાર્યક્રમ જાહેર કરાયો છે. કાર્યક્રમ અંતર્ગત હાલમાં ગણતરીનો તબક્કો ચાલી રહ્યો છે. આ કામગીરી સુચારૂ રીતે સમયસર પૂર્ણ થાય તે માટે જિલ્લા ચૂંટણી અધિકારી અને કલેક્ટરના માર્ગદર્શન હેઠળ જિલ્લા કક્ષાએ તથા છ વિધાનસભાના પ્રાંત અધિકારીની કક્ષાએ માન્ય રાજકીય પક્ષોની બેઠક યોજાઇ હતી. જિલ્લા કક્ષાની બેઠકમાં હાલમાં ચાલી રહેલ મતદારયાદી સુધારણા કાર્યક્રમના વિવિધ તબક્કા વિશે સમજ આપવામાં આવી હતી. ત્યારબાદ ગણતરી ફોર્મ વિશે સમજૂત કરવામાં આવ્યા અને ગણતરી ફોર્મની વિધાનસભા વાઇઝ કેટલી કામગીરી થયેલ છે અને હવે કેટલી બાકી છે તે બાબતની પણ જાણ કરવામાં આવી હતી. માન્ય રાજકીય પક્ષોને બીએલએ-1 અને બીએલએ-2ની નિમણૂક બાકી હોય તો તે પણ તાત્કાલિક પૂરી કરવા કહેવામાં આવ્યું હતું. છ વિધાનસભા મતદાર વિભાગોમાં આવેલ જુદા જુદા સ્થળો ખાતે તા. 29/11/2025 (શનિવાર)ના રોજ બપોરે 12 કલાકથી સાંજે 5 કાક સુધી અને તા. 30/11/2025 (રવિવાર)ના રોજ સવારે 10 કલાકથી સાંજે 5 કલાક સુધી ગણતરી ફોર્મ ભરીને કેમ્પ ખાતે જમા કરાવી શકશે તે બાબતની પણ જાણ કરવામાં આવી હતી. જિલ્લા કક્ષાની બેઠકમાં ભારતીય જનતા પાર્ટીના પ્રતિનિધિ તરીકે જયદીપસિંહ જાડેજા, ભારતીય રાષ્ટ્રીય કોંગ્રેસના પ્રતિનિધિ તરીકે સહેજાદ સમા, આમ આદમી પાર્ટીના પ્રતિનિધિ તરીકે વનરાજસિંહ વાઘેલા અને બહુજન સમાજ પાર્ટીના પ્રતિનિધિ તરીકે આસિફ ખત્રી હાજર રહ્યા હતા.