ભુજ, તા. 28 : પ્રેક્ષા
વિશ્વભારતીમાં વર્ષ 2025નું
ચાતુર્માસ વિતાવી રહેલા જૈન શ્વેતાંબર તેરાપંથ ધર્મસંઘના આચાર્ય મહાશ્રમણની સાનિધ્યમાં
તેમના ગુરુ, તેરાપંથ ધર્મસંઘના નવમા આચાર્ય તુલસીનો 112મો જન્મોત્સવ આધ્યાત્મિક રીતે ઉજવાયો હતો. સમગ્ર દેશમાં
આચાર્ય તુલસીનો જન્મ દિવસ `અણુવ્રત
દિવસ' તરીકે ઉજવાયો હતો. આચાર્ય મહાશ્રમણજીએ જણાવ્યું હતું કે,
મનુષ્ય જીવનમાં અનુકૂળતા અને પ્રતિકુળતા બંને આવે છે. સાધુએ બંને પરિસ્થિતિમાં
સમભાવથી જીવવું જોઇએ. કાર્તિક સુદ બીજના લાડનૂંમાં ખટેડ પરિવારમાં જન્મેલા શિશુ આચાર્ય
તુલસી તરીકે પ્રસિદ્ધ બન્યા. પોષ વદ પંચમી વિ.સ. 1982એ બાળક તુલસીએ સન્યાય સ્વીકાર્યો હતો. તેમણે જીવનકાળમાં
ધર્મસંઘ માટે અનેક કાર્યો કર્યા હતા. આર્ચાશ્રીએ વધુમાં જણાવ્યું હતું કે આચાર્ય તુલસીનો
વિશ્વ હિંદુ પરિષદ સાથે પણ નિકટનો સંબંધ રહ્યો હતો. અશોક સિંધલ સાથે સ્નેહબંધન હતું.
વિશ્વ હિંદુ પરિષદના ઉપસ્થિત સભ્યોને આ ઉત્સાહ જળવાઇ રહે તેવી આશા વ્યક્ત કરી હતી.
ગુરુવારે `વીર ભિક્ષુ સમવ સરણ' ખાતે આચાર્ય તુલસીના 112માં
જન્મોત્સવ `અણુવ્રત દિવસ' તરીકે ઉજવવા ભક્તો ઉપસ્થિત રહ્યા હતા. તેરાપંથ ધર્મસંઘની નવમી સાધ્વી પ્રમુખા
વિશ્રુત વિભાએ આચાર્ય તુલસીના જીવનકૃત્યોનો ઉલ્લેખ કર્યો હતો. તેરાપંથ મહિલા મંડળ તથા
કિશોર મંડળ અમદાવાદ દ્વારા પ્રસ્તુતિ કરાઇ હતી. વિશ્વ હિંદુ પરિષદ અમદાવાદના મંત્રી
અમિત શાહે અભિવ્યક્તિ આપી હતી. સુશીલ ખટેડ તથા છતરસિંહ ખટેડે વિચારો વ્યકત કર્યા હતા. દીપક કોઠારીએ ગીત રજૂ કર્યું હતું. અખિલ
ભારતીય તેરાપંથ મહિલા મંડળના મહામંત્રી રચના હીરણે રજૂઆત કરી હતી. આ પ્રસંગે અણુવ્રત
વિશ્વભારતી સોસાયટી દ્વારા તુલસી અણુવ્રત સિંહનાદ વિશેષાંકનું આચાર્યના હસ્તે લોકાર્પણ
કરાયું હતું. તેવું યાદીમાં જણાવાયું હતું.
