પ્રવાસીઓને સુખદ અનુભવ મળે તે માટે માર્ગદર્શન અપાયું

ભુજ, તા. 11 :  આગામી દિવસોમાં રણોત્સવમાં સહભાગી થવા લાખોની સંખ્યામાં પ્રવાસીઓ જ્યારે કચ્છ જિલ્લાની મુલાકાતે આવનારા છે, ત્યારે કચ્છ કલેક્ટર આનંદ પટેલની અધ્યક્ષતામાં બેઠક યોજાઈ હતી. આ બેઠકમાં કલેક્ટર આનંદ પટેલે કચ્છના હોમ સ્ટે/રિસોર્ટધારકો સાથે સંવાદ કરીને તેમના પ્રશ્નો અંગે જાણકારી મેળવી હતી. કલેક્ટર શ્રી પટેલે દરેક હોમ સ્ટે / રિસોર્ટધારકોને રિસ્પોન્સિબલ ટૂરિઝમના ધ્યેય સાથે પ્લાસ્ટિક પ્રતિબંધિત વિસ્તારમાં પ્લાસ્ટિકનો ઉપયોગ નહીં કરવા અનુરોધ કર્યો હતો. કચ્છમાં મહત્તમ સંખ્યામાં પ્રવાસીઓ આવે, સ્થાનિક લોકોને રોજગારી મળે અને સ્થાનિક કલા/લોકકલાનો વિકાસ થાય તે માટે સરકાર પ્રયત્નશીલ હોઈ ધોરડો, ધોળાવીરા સહિત વિસ્તારના તમામ હોમ સ્ટે/રિસોર્ટધારકો પણ પ્રવાસીઓનો અનુભવ સુખદ રહે તે માટે જરૂરી હાઈજિન જાળવે, સ્વચ્છતા રાખે અને પારદર્શિતા અપનાવે, તેમ કલેક્ટર શ્રી પટેલે જણાવ્યું હતું.  કચ્છ આવતા પ્રવાસીઓ ઓનલાઈન રણ પરમિટ મેળવી શકે તે માટે ક્યુઆર કોર્ડથી પરમિટ મેળવવા અંગે માર્ગદર્શન આપ્યું હતું.  આ બેઠકમાં જિલ્લા વિકાસ અધિકારી ઉત્સવ ગૌતમ, જિલ્લા ગ્રામ વિકાસ એજન્સીના નિયામક નિકુંજ પરીખ, ભુજ પ્રાંત અધિકારી અનિલ જાદવ, ભચાઉ પ્રાંત અધિકારી જ્યોતિ ગોહિલ, ખાવડા સિનિયર નાયબ મામલતદાર અમિત પરમાર, ધોરડો સરપંચ મિંયાહુસેન, ધોળાવીરા સરપંચ જીલુભા સોઢા સહિત અધિકારીઓ, હોમ સ્ટે / રિસોર્ટના સંચાલકો / માલિકો ઉપસ્થિત રહ્યા હતા.