આનંદ કે. વ્યાસ તરફથી : નવી દિલ્હી, તા. 29 : સોમવારથી શરૂ થનારા સંસદના શિયાળુ અધિવેશનમાં એસઆઇઆર (સ્પેશિયલ
ઇન્ટેન્સિવ રિવિઝન-મતદારયાદી પુન: નિરીક્ષણ) અને રાષ્ટ્રગાન વંદે માતરમ્ ઉપર ચર્ચા
થશે તેમજ સરકાર ન્યૂક્લીયર એનર્જી (અણુ ઊર્જા) અને હાયર એજ્યુકેશન સહિત દસ મહત્ત્વના
ખરડા લાવવા માગે છે. શિયાળુ અધિવેશન ત્રણ અઠવાડિયા ચાલશે. રાષ્ટ્રગાન વંદે માતરમ્ની
સાર્ધશતાબ્દી (દોઢસો વર્ષ)ની ઉજવણી દેશમાં ચાલી રહી છે તેથી સરકાર આ ગીત ઉપર સંસદમાં
ચર્ચા કરાવવા માગે છે. સાતમી નવેમ્બરે વડા પ્રધાન નરેન્દ્ર મોદીએ વંદે માતરમ્ને દોઢસો
વર્ષ થયા એની ઉજવણીના અવસરે સંબોધનમાં આક્ષેપ કર્યો હતો કે, 1937માં આ ગીતના
કેટલાક અંતરાઓ દૂર કરાયા, એના પગલે દેશના
વિભાજનનાં બીજ રોપાયાં હતાં. હવે સ્વતંત્ર ભારતમાં રાષ્ટ્રગાન વંદે માતરમ્ પૂર્ણ રૂપે
ગવાય એ જરૂરી છે. લોકસભાના અધ્યક્ષ અને રાજ્યસભાના સભાપતિ તમામ રાજકીય પાર્ટીઓને વંદે
માતરમ્ની ચર્ચામાં જોડાવાનું કહેશે અને સંસદના અધિવેશનના સમાપન વેળા સામૂહિક રાષ્ટ્રગાન
થાય જ છે, તેથી આ ચર્ચા જરૂરી છે એવું પણ સભ્યોને કહેવાશે. આ
ઉપરાંત સરકાર ન્યૂક્લીયર એનર્જીના ખરડામાં સુધારા સહિત હાયર એજ્યુકેશન, કોર્પોરેટ લો અને સેક્યુરિટીઝ માર્કેટ સહિતના દસ મહત્ત્વના ખરડા લાવવા માગે
છે. બીજી તરફ વિપક્ષો બંગાળ, તામિલનાડુ, ગુજરાત સહિતના નવ રાજ્યો અને ત્રણ કેન્દ્રશાસિત પ્રદેશોમાં કેન્દ્રીય ચૂંટણીપંચ
દ્વારા ચાલી રહેલા એસઆઇઆરનો જોરદાર વિરોધ કરવાની તૈયારી કરી રહ્યા છે. અગાઉ બિહારમાં
એસઆઇઆર વખતે લોકસભામાં વિપક્ષના નેતા રાહુલ ગાંધીએ વોટ ચોર ગદ્દી છોડના નારા સાથે એની
સામે જોરદાર સવાલો ઉઠાવ્યા હતા અને હવે બંગાળમાં ચૂંટણીપંચની આ પ્રક્રિયા સામે તૃણમૂલ
કોંગ્રેસના નેતા અને મુખ્યપ્રધાન મમતા બેનરજીએ પણ વોટબંધી કહીને એનો વિરોધ શરૂ કર્યો
છે. બંગાળ અને તામિલનાડુમાં આવતા વર્ષે ચૂંટણી છે, તેથી તામિલનાડુમાં
સત્તાધીશ ડીએમકે અને મુખ્યપ્રધાન એમ કે સ્ટાલિન પણ એસઆઇઆરના વિરોધમાં મોરચો ખોલી બેઠા
છે, ઉત્તરપ્રદેશમાં સમાજવાદી પાર્ટી પણ એસઆઇઆરના વિરોધમાં છે.
સરકાર ચૂંટણી સુધારા સહિતના કોઇ પણ મુદે ચર્ચા માટે તૈયાર હોવાનું કહી રહી છે પરંતુ
એસઆઇઆર સંબંધી કોઇ નિર્ણય કે નિયમો તેમ જ ચૂંટણી પંચ દ્વારા આ માટેની પ્રક્રિયા સંબંધી
કોઇ ચર્ચા કરવા નથી ઇચ્છતી. સોમવારથી 19 ડિસેમ્બર સુધી ચાલનારા અધિવેશનમાં સંસદના બંને ગૃહોમાં સારી
રીતે કામગીરી થઇ શકે એ માટે સંસદીય કાર્યપ્રધાન કિરેન રિજિજુએ રવિવારે સર્વપક્ષીય બેઠક
બોલાવી છે. જેમાં સરકાર તરફથી સંસદની કાર્યવાહીમાં તેઓ વિપક્ષોનો સહકાર ઇચ્છશે. બીજી
તરફ કૉંગ્રેસ તરફથી પણ રવિવારે સાંજે પાંચ
વાગ્યે સોનિયા ગાંધીના નિવાસસ્થાને વિપક્ષોની બેઠક બોલાવી છે. કૉંગ્રેસ આ બેઠકમાં સંસદમાં
એસઆઇઆરનો સામુહિક વિરોધ કરીને નાગરિકોના અધિકારો સંબંધી આક્રમક રજૂઆત અને ચર્ચાનો વ્યૂહ
ઘડશે, એવું મનાય છે. આ ઉપરાંત વિપક્ષ તાજેતરમાં લાલકિલ્લા
નજીક થયેલા બૉમ્બ વિસ્ફોટ મામલે પમ સરકારને સવાલો કરશે. અૉપરેશન સિંદૂર બાદ દેશની વિદેશનીતિ
તેમ જ સરહદી સુરક્ષા તેમ જ દેશમાં બેરોજગારી સહિતના કેટલાક પ્રશ્નો સંબંધે પણ વિપક્ષો
સરકાર સામે સવાલો કરશે.
