ઓફલાઇન ટ્રેન યાત્રીને વીમો કેમ નહીં ?

નવી દિલ્હી, તા. 28 : માત્ર ઓનલાઇન ટિકિટ ખરીદનાર યાત્રીને જ વીમા કવચ અપાય છે, ઓફલાઇન યાત્રીઓ સાથે ભેદભાવ કેમ, તેવો સવાલ સુપ્રીમકોર્ટે ભારતીય રેલવેને પૂછયો હતો. એક સુનાવણી દરમ્યાન સુપ્રીમે રેલવેને આ ભેદભાવ પાછળ કારણ શું તેવું પૂછયું હતું. લાખો યાત્રી આજે પણ ઓફલાઇન ટિકિટ બુકિંગ કરાવે છે. ન્યાયમૂર્તિ અહસાનદ્દિન અમાનુકલાહ અને જસ્ટિસ વિનોદચંદ્રનની ખંડપીઠે કડક  સ્વરે કહ્યું હતું કે, ઓનલાઇન કે ઓફલાઇન ટિકિટ ખરીદે, દરેક યાત્રીના જીવની કિંમત સમાન છે. સર્વોચ્ચ અદાલતે ઓફલાઇન ટિકિટ ખરીદનાર યાત્રીઓને અકસ્માતના વીમાની સુવિધાથી વંચિત કેમ રખાય છે, તેનો જવાબ 13મી જાન્યુઆરી સુધી વિસ્તૃત રીતે આપવા રેલવેને નિર્દેશ આપ્યો હતો. સુપ્રીમકોર્ટે કરેલા સવાલ પર 13 જાન્યુઆરીનાં કોઇ સકારાત્મક ફેંસલો થાય તો એ લાખ લોકો માટે મહત્ત્વપૂર્ણ સાબિત થશે, કે રોજ ટ્રેનમાં સફર કરી રહ્યા છે. જો કોર્ટ રેલવેને ઓફલાઇન ટિકિટ લેતા યાત્રીઓ માટે પણ વીમા કવચ આપવાનો આદેશ આપે તો એ દેશની સૌથી મોટી પરિવહન પ્રણાલીનો સૌથી મોટો બદલાવ બનશે.