શેરબજારે રચ્યો ઈતિહાસ : નવા શિખરે

નવી દિલ્હી, તા. 27 : ભારતીય શેરબજારમાં આજે ગત વર્ષનાં સર્વોચ્ચ શિખરને બન્ને પ્રમુખ શેરઆંકોએ સર કરી લીધા હતાં અને નવી અભૂતપૂર્વ સર્વોચ્ચ સપાટી નોંધાવી હતી. જો કે આજે દિવસ દરમિયાન ભારે ઉતાર-ચઢાવ અને ઉપલા સ્તરેથી નફાતારવણી પછી મામૂલી વધારા સાથે સેન્સેક્સ અને નિફ્ટી બંધ આવ્યા હતાં. જો કે સર્વોચ્ચ શિખરેથી લપસી ગયેલા શેરબજારમાં આજે રોકાણકારોને 53000 કરોડ રૂપિયાનું નુકસાન થયું હતું. શેરબજારમાં આજે નવો ઈતિહાસ રચાયો હતો. ગત વર્ષે સપ્ટેમ્બરમાં નિફ્ટીએ 26277 અને સેન્સેક્સે 85978 અંકનાં શિખર બનાવ્યા હતાં. જે આજે બન્ને શેરઆંકે તોડી નાખ્યા હતાં. નિફ્ટી આજે 26310 અને સેન્સેક્સ 86055ની નવી ટોચ બનાવી હતી. જો કે આ સર્વોચ્ચ સ્તરેથી સારી એવી નવા વસૂલી નીકળી હતી અને કારોબારનાં અંતે સેન્સેક્સ 110 અંક વધીને 85720 અને નિફ્ટી 10 પોઈન્ટ વધીને 26215નાં સ્તરે બંધ આવ્યો હતો. જો કે બન્ને પ્રમુખ શેરઆંકની આ તેજીમાં વ્યાપક બજારની ભાગીદારીનો પણ અભાવ જોવા મળ્યો હતો. બીએસઈ સ્મોલકેપ ઈન્ડેક્સ 0.38 ટકાનાં ઘટાડા સાથે તો મિડકેપ 0.01 ટકાનાં નગણ્ય ઘટાડા સાથે બંધ થયા હતાં. સેક્ટોરલ મોરચે વાત કરવામાં આવે તો ફાઈનાન્સિયલ સર્વિસ, મીડિયા, આઈટી અને ખાનગી બેન્કોમાં હલકી મજબૂતી જોવા મળેલી. તો એફએમસીજી સેક્ટર લગભગ સપાટ રહ્યું હતું. બાકીનાં મોટાભાગનાં સેક્ટરમાં દબાણ દેખાયું હતું. બીએસઈમાં નોંધાયેલી કંપનીઓનું બજાર મૂડીકરણ આજે ઘટીને 474.39 લાખ કરોડ રૂપિયા થઈ ગયું હતું. જે આગલા દિવસનાં કારોબારી દિવસનાં અંતે 474.92 લાખ કરોડ હતું. આમ આજે રોકાણકારોને 53000 કરોડ રૂપિયાની ખોટ આવી હતી.