વકરતી શિકાર પ્રવૃત્તિ, વાહન તળે વન્યજીવોનાં મોતથી પર્યાવરણને હાનિ

નખત્રાણા, તા. 29 : જંગલ-સીમાડા-ડુંગરોમાં વિચરતા જંગલી જાનવરો, પશુપક્ષીઓનાં શિકારની વકરતી પ્રવૃત્તિ તથા ખોરાક માટે રઝળતા પશુઓ માર્ગો પર પસાર થતાં વાહનોની હડફેટે આવતાં નીપજતાં મોતથી વન સીમાડામાં તેમની વસ્તી ઉત્તરોત્તર ઘટતી હોવાથી જીવદયા-પર્યાવરણપ્રેમીઓમાં ચિંતા વ્યાપી હતી. સરકાર દ્વારા વન્ય પ્રાણીઓનાં રક્ષણ માટે રખાલોમાં સુરક્ષા, અન્ય સાધનો ઉપલબ્ધ કરવા લાખો-કરોડોનાં ખર્ચ કરવામાં આવે છે પણ જીવસૃષ્ટિનું થતું નિકંદન રોકવા પગલાં લેવાતા ન હોવાની રાવ ઊઠી હતી. થોડા સમય અગાઉ છારીઢંઢ કાંઠાળ વિસ્તારમાં કુંજ - પેણ પક્ષીઓનો શિકાર કરતા શિકારીઓ રંગેહાથ પકડાયા હોવા છતાં ગુનેગારોને ગુના સબબ કોઇ સજા થયાની વિગતો પ્રકાશમાં આવી નથી. એક સમયે પશુ-પ્રાણી-પક્ષીઓથી ગુંજતા વગડા શિકારીઓ તથા વાહનોને હડફેટે આવી જતાં થતાં મોતથી જંગલ સીમાડા સૂનકાર બનતાં પર્યાવરણના શેષ અલ્પસંખ્યામાં જીવિત પશુ-પક્ષી-પ્રાણીઓની વસ્તી વધારવા વન, જંગલ તંત્ર દ્વારા પગલાં લેવા જરૂરી હોવાનું જીવદયાપ્રેમીઓએ જણાવ્યું હતું. નોળિયા, જબાતિયા, શેવરા, શિયાળ, જંગલી બિલાડા જેવા ખોરાક માટે રઝળતા નિર્દોષ પ્રાણીઓ આકસ્મિક અથવા તો વાહનચાલકોની બેદરકારીથી વાહનો હડફેટે આવી જઇ કચડાતાં જીવદયાપ્રેમીઓને આઘાત સહન કરવો પડે છે. અગાઉ નખત્રાણાથી મોટી વિરાણી જતા માર્ગમાં જબાતિયા નામના નોળિયાની પ્રજાતિ વાહનની હડફેટે આવી જતાં મોત થયું હતું. કચ્છના જંગલ-વાડીઓમાં વિચરતા જબાતિયા પ્રાણી જેને અંગ્રેજીમાં સ્મોલ ઇન્ડિયન સીવેટ કહેવાય છે તે ખોરાક માટે સર્પ, વીંછી, દેડકાં, મકોડા જેવા જીવોનું મારણ કરતા હોવાનું પક્ષીવિદ્ વૈજ્ઞાનિક જુગલકિશોર તિવારીએ જણાવ્યું હતું.