ગાંધીધામ, તા. 29 : પૂર્વ કચ્છમાં પોલીસે જાહેરનામાનો
ભંગ કરનારા મકાન માલિકો તથા મજૂરો પૂરા પાડતા લેબર કોન્ટ્રાક્ટરો સામે જુદા-જુદા ગુના
નોંધ્યા હતા. તેવામાં અહીંની મહાનગરપાલિકામાં શ્રમિકો પૂરા પાડનારા કોન્ટ્રાક્ટરે નિયમોનો
ભંગ કરતા ગુનો નોંધાયો હતો. પૂર્વ કચ્છમાં એસ.ઓ.જી.એ અંજાર તાલુકાના જુદા-જુદા ગ્રામ્ય
વિસ્તારોમાં કાર્યવાહી કરી હતી. અહીં અમુક મકાન માલિકોએ પરપ્રાંતિયોને મકાન ભાડે આપ્યાં
હતાં તેમજ અમુક લેબર કોન્ટ્રાક્ટરોએ પોલીસ કે મદદનીશ મજૂર કમિશનરને જાણ કરી નહોતી.
તેવા લોકો સામે ગુનો નોંધવામાં આવ્યો હતો. મજૂરોની નોંધણી મદદનીશ મજૂર કમિશનર સમક્ષ
નોંધણી કરાવી જે એકમમાં મજૂરો પૂરા પડાય છે તેની યાદી, ઓળખપત્રો લેબર કમિશનર તથા પોલીસ વિભાગને સુપરત
કરવાના હોય છે. તેમજ દર માસે આ યાદી કમિશનર, પોલીસને આપવાની હોય
છે. તથા શ્રમિકોની સંપૂર્ણ વિગત, ફોટા સાથેનું રજિસ્ટર નિભાવવાનું
હોય છે. નોંધણી વગર કોન્ટ્રાક્ટર મજૂરની ફાળવણી એકમોમાં કરી શકશે નહીં તે અંગેનું જાહેરનામું
જિલ્લા કલેક્ટરે બહાર પાડયું છે. ગાંધીધામ એ ડિવિઝનની એક ટીમ શહેરના વોર્ડ-6, પ્લોટ નંબર 16માં ગઈ હતી, ત્યાં મહાનગરપાલિકામાં મજૂર પૂરા પાડનારા દરબાર
વેસ્ટ કોર્પોરેશનના અરવિંદ દિનિયા ઓદુનિયાને પૂછપરછ કરતા પોતે આવી કોઈ શરતોનું પાલન
ન કરતા હોવાનું જણાવ્યું હતું. અમલવારી ન કરનારા આ શખ્સ સામે પોલીસે ગુનો દર્જ કર્યો
હતો. લેબર કમિશનરમાં નોંધણી ન હોવા છતાં મહાપાલિકા આવું કૃત્ય કેવી રીતે ચલાવતી હશે
તે પ્રશ્ન ઉછળીને સપાટી ઉપર આવ્યો હતો.
