ભુજ, તા. 29 : જેમ જેમ ઠંડીની સિઝન જામી રહી
છે તેમ તેમ નિશાચરોની પણ મોસમ પૂરબહારમાં ખીલી હોય તેવો તાલ સર્જાયો છે, જે થોડા દિવસોમાં થયેલી ચોરી પરથી સ્પષ્ટ થાય
છે. મુંદરામાં રહેતો મૂળ ઉત્તરપ્રદેશનો પરિવાર ઘર બંધ કરી વતનમાં લગ્ન પ્રસંગે ગયો
ને બીજા જ દિવસે પડોશીનો ફોન આવતાં 1.60 લાખનાં ઘરેણાની ચોરી થયાનું સામે આવ્યું છે. પશ્ચિમ કચ્છમાં
થોડાક દિવસ પહેલાં બિદડામાં મંદિર ચોરી, ભુજમાંથી પણ એકથી વધુ ચોરીના ભેદ હજુ ઉકેલાયા નથી. આમ, કચ્છમાં ચોર તત્ત્વોના ઉધામા વધ્યા છે તે વચ્ચે વધુ એક ચોરીની ફરિયાદ ગઇકાલે
મુંદરા પોલીસ મથકે મૂળ ઉત્તરપ્રદેશ, પરંતુ છેલ્લા ચારેક વર્ષથી
અહીં સ્થાયી થયેલા મકાન નં. 6માં કલાપૂર્ણ વિલા, યુ.એસ. વિલા પાસે મુંદરામાં રહેતા પંચશીલ રાજેશકુમાર શાક્યાએ નોંધાવેલી ફરિયાદ
મુજબ ગત તા. 21/11ના બપોરે
ઘર બંધ કરી પરિવાર સાથે ઉત્તરપ્રદેશ લગ્ન પ્રસંગે ગયા હતા અને બીજા દિવસે સાંજે ફરિયાદીના
પત્ની નિકીતાબેનને પડોશી રીનાબેન ભાલિયાનો ફોન આવ્યો ને જણાવ્યું કે, તમારાં ઘરનો દરવાજો કેમ ખુલ્લો છે, પરંતુ અમે કહ્યું કે, ઘર બંધ કરીને અમે લગ્ન પ્રસંગે
ગયા છીએ... તમે જરાક તપાસ કરો... થોડીવાર બાદ ફરી ફોન આવ્યો અને કહ્યું કે,
ઘરના દરવાજાનું તાળું તૂટેલું છે અને અંદર સામાન વેરવિખેર છે. આથી ફરિયાદી
પરિવારે કહ્યું, તમે દરવાજો બંધ કરાવી અમે બહાર છીએ ત્યાં સુધી
ધ્યાન રાખજો. આ બાદ ફરિયાદીએ વતનથી પરત આવીને જોતાં કબાટમાં રાખેલી સોનાની ચેઇન 16 ગ્રામની, ત્રણ ગ્રામની વીંટી, ચાર
જોડી કાનની ઇયરિંગ, ચાર નાકના દાણા અને સોનાનું પેન્ડલ તથા ચાંદીના
છડા, વીંટી ત્રણ સહિતનાં ઘરેણા જેની કુલ કિં. રૂા. 1,60,300ની કોઇ અજાણ્યા ચોર ઇસમ ચોરી
કરી લઇ ગયાની ફરિયાદ નોંધાવતાં પોલીસે છાનબીન આદરી છે. બહારગામ જાઓ છો, ઘરમાં કિંમતી સામાન ન રાખો અત્રે ઉલ્લેખનીય છે કે, ચોર
તત્ત્વો સતત બંધ ઘરની રેકી કરતા હોય છે અને લાગ મળતાં જ હાથફેરો કરી દેતા હોય છે. સાવચેતીના
ભાગરૂપે પોલીસ તંત્ર પણ અગાઉ જાહેર કરી ચૂક્યા છે. ઘર બંધ કરી બહાર જતા લોકોએ પોતાનાં
ઘરમાં કિંમતી સામાન ન રાખવા તેમજ નજીકના પોલીસ મથકે તથા પડોશીઓને ખાસ ભલામણ કરવા સૂચન
કરતા હોય છે, ત્યારે હવે ફરી ચોર તત્ત્વોના ઉધામા વધ્યા છે ત્યારે
લોકોએ જ સચેત રહેવું જરૂરી બન્યું છે.
