ભચાઉમાં સરકારી જમીન ઉપર થતાં ગેરકાયદે બાંધકામ મુદ્દે ઉચ્ચ સ્તરે રજૂઆત

ગાંધીધામ, તા. 29 :  ભચાઉ તાલુકામાં આવેલી સરકારી જમીન  ઉપર ગેરકાયદે કબજો મેળવનારા આરોપીઓ દ્વારા દીવાલ બનાવવાની કામગીરી કરાતી હોવાનો બનાવ પ્રકાશમાં આવ્યો  છે. આ મામલે  ઉચ્ચ સ્તરે રજૂઆત કરાઈ છે. આ અંગે મળતી વિગતો મુજબ ભચાઉ સ્થિત સર્વે નંબર 1410-1 અને 1410-2 સરકારી જમીનમાં માથાભારે શખ્સો દ્વારા અગાઉ પણ દબાણ કરવાની પેરવી કરાઈ હતી અને કંપનીમાં જવાના જાહેર રસ્તા પણ અવરોધાયા હતા. આ મામલે કોર્ટમાં ફરિયાદ કરાયા બાદ કોર્ટ  દ્વારા દાવો પણ રદ કરી નાખવામાં આવ્યો હતો, તેમ છતાં આરોપીઓ દ્વારા આ કિંમતી સરકારી  જમીન ઉપર બાઉન્ડ્રીનું કામ કરવામાં આવી રહ્યું છે. સરકારી જમીન ઉપર કબજો કરવા માટે સંગઠિત નેટવર્ક  કાર્યરત હોવાની આશંકા પત્રમાં વ્યક્ત કરવામાં આવી છે.  આ મામલે ઉચ્ચ સ્તરીય તપાસ કરાય,  જમીન ઉપર બાઉન્ડ્રી બાંધવાની તમામ કામગીરી બંધ કરવાના આદેશ આપવામાં આવે અને જમીન દબાણ કરનારા અને તેમાં સંડોવાયેલા લોકો સામે  ફોજદારી દર્જ કરવામાં આવે તેવી માંગ અરજદાર હરેશ વિધાણી દ્વારા કરવામાં આવી છે.  મુખ્યમંત્રી, ગૃહમંત્રી, રાજ્યના ચીફ સેક્રેટરી, વડાપ્રધાન કાર્યાલય, પૂર્વ કચ્છ પોલીસવડા સહિતનાને પત્ર પાઠવી સરકારી જમીન ઉપર થતી ગેરકાયદે પેશકદમી સામે પગલાં લેવા ભારપૂર્વકની માંગ કરવામાં આવી છે.