મોટી વિરાણીમાં આશાસ્પદ સગીરે જીવન ટુંકાવતા ગામમાં અરેરાટી

મોટી વિરાણી (તા.નખત્રાણા)/ ગાંધીધામ, તા. 28 : નખત્રાણા તાલુકાના મોટી વિરાણી ગામે દલિત સમાજના અને ભણવામાં હોંશિયાર એવા આશાસ્પદ 16 વર્ષીય સગીર હેત કાનજી બળિયાએ ગળેફાંસો ખાઈ જીવન ટૂંકાવી લેતા ગામમાં અરેરાટી વ્યાપી હતી. બીજીતરફ ગાંધીધામના પડાણામાં આવેલા ઔદ્યોગિક એકમમાં 26 વર્ષીય યુવાન ઉમેશ દેવકી રવિદાસે પણે ગળેફાંસો ખાઈ મોતને વહાલું કર્યું હતું. મોટી વિરાણીમાં રહેતા 16 વર્ષના હેત બળિયાએ ગઈકાલ મોડી રાતથી આજ સવાર દરમ્યાન કોઈ અગમ્ય કારણોસર પોતાના ઘરના રસોડાની ખાડીમાં દુપટ્ટો બાંધી ગળેફાંસો ખાઈ લીધો હતો. દાદા મનજી પચાણે પૌત્રને ફાંસો ખાધેલી હાલતમાં જોતા તેને સરકારી દવાખાને સારવાર અર્થે લઈ ગયા હતા. પરંતુ ફરજ પરના તબીબે મૃત જાહેર કર્યો હતો. નખત્રાણા પોલીસે અકસ્માત મોતનો ગુનો દાખલ કરી તજવીજ આદરી હતી. દાદા મનજીભાઈએ જણાવ્યું હતું કે, મૃતક હેતના પિતા કાનજીને પાંચ વર્ષ પૂર્વે સેટરીંગ કામ દરમ્યાન શોર્ટ લાગતા મૃત્યુ પામ્યા હતા. વિધવા માતા, એક ભાઈ તથા બહેન આર્થિક પરિસ્થિતિ વચ્ચે ગુજરાન ચલાવે છે. હેતના કાકા પૂર્વ સરપંચ ગોવિંદભાઈએ જણાવ્યું હતું કે, હતભાગી હેત 12મા ધોરણમાં અભ્યાસ કરતો હતો અને તે ભણવામાં હોંશિયાર હતો. આ આશાસ્પદ સગીરના મોતથી પરિવાર પર આભ તૂટી પડયો છે. બનાવના પગલે ગામમાં અરેરાટી વ્યાપી છે. આ ઉપરાંત અન્ય બનાવમાં પોલીસસુત્રોએ વિગતો આપતા જણાવ્યું હતુ કે, પડાણાના નિલકંઠ પોલ મેનીફેકચરી પ્રા.લી માં રહેતા  ઉમેશ રવિદાસે પોતાના ઘરમાં ગત તા.27/11 ના 6 વાગ્યાના અરસામાં કોઈ કારણે ગળેફાંસો ખાદ્યો હતો.તેમને સારવાર માટે લવાતા રામબાગ હોસ્પિટલના ડો.હર્ષદ કવાડે તેમેન મૃત જાહેર કર્યા હતા. આ યુવાને કયાં કારણોસર આ પ્રકારનુ અંતિમ પગલુ ભરી લીધુ હતુ તે જાણવા માટે  પોલીસે અકસ્માત નોંધના આધારે વધુ તપાસ આરંભી છે.