મુંદરામાં ફરી ફટાકડાનું કન્ટેનર ઝડપાયુ

મુંદરા, તા. 28 : દિવાળી પૂર્ણ થઈ ગઈ અને લોકોએ મન ભરીને ફટાકડા ફોડ્યા.., પણ બંદર ઉપર હજુ ફટાકડા ફૂટી રહ્યા છે. થોડા દિવસો પહેલાં કાચના ગ્લાસ અને ફૂલદાનીની આડમાં ચાઈનીઝ ફટાકડાના બે કન્ટેનર ઝડપાયા બાદ મુંદરા પોર્ટ પાસેના એક ખાનગી સીએફએસમાં વધુ એક ફટાકડા ભરેલું કન્ટેનર પકડાયું છે. ચીનથી વોલ પેપર ડિક્લેર કરીને મંગાવાયેલા અને ફટાકડા ભરેલા આ કન્ટેનરની આ લખાઈ રહ્યું છે ત્યારે તપાસ ચાલુ છે અને કેટલો જથ્થો અને કેટલી કિંમત છે તેની સત્તાવાર માહિતી પછી જાહેર કરવામાં આવશે એવો કસ્ટમ તંત્ર પ્રતિભાવ આપે છે.   ઘટનાની મળતી વિગતો મુજબ, મુંદરાના એક ખાનગીમાં સીએફએસમાં ડોક એક્ઝામ દરમિયાન ચકાસણી નીકળતાં આ કન્ટેનરમાં ફટાકડાની શંકા ઉભી થઈ હતી અને સીએફએસ કસ્ટમ અધિકારીએ મુન્દ્રા કસ્ટમની સ્પેશિયલ ઈન્ટેલિજન્સ બ્યુરો (એસ.આઈ.બી.)ના અધિકારીઓને જાણ કરતાં આ આખો મામલો બારે આવ્યો હતો. જેમાં છેલ્લા લગભગ ત્રણ દિવસથી આ કન્ટેનરની તપાસ થઈ રહી છે અને આ કન્ટેનર ચીનથી વાયા દુબઈ થઈ આવ્યાનું હ પણ પ્રાથમિક રીતે બહાર આવ્યું છે. કસ્ટમ સૂત્રોએ નામ નાહિં આપવાની સાથે જણાવ્યું હતું કે, સીએચએ દ્વારા બિલ ઓફ એન્ટ્રીમાં વોલપેપર ડિકલેર કરવામાં આવ્યું હતું. આ પછી તપાસમાં ફટાકડા નીકળતાં તેની ગણતરી ચાલી રહી છે. આમાં કેટલો જથ્થો અને કેટલા રૂપિયાની કિંમત છે, એવો પ્રશ્ન પૂછતાં જણાવ્યું હતું કે, સત્તાવાર પ્રેસ યાદી હવે પછી સંભવિત કાલે બહાર પાડવામાં આવશે. દરમિયાન આધારભૂત સૂત્રોએ આ જાણકારી બાદ આશ્ચર્ય કર્યું હતું કે, એક કન્ટેનરમાં તપાસ કરતાં ત્રણ દિવસ કેમ લાગે એ મોટો પ્રશ્ન છે ? આમાં કોઇ મોટાં માથાંને બચાવવાના પ્રયાસો થઇ રહ્યાના પણ તર્ક ઉઠી રહ્યા છે. કારણ કે હજુ સુધી સત્તાવાર રીતે આયાતકારનું નામ પણ જાહેર કરવામાં આવતું નથી.