ભુજ, તા. 28 : ગત
તા. 25/11ના ધોળા દિવસે
ભુજના ગોધરાવાળી ધર્મશાળા સામે જૂના રેલવે સ્ટેશનની કોલોનીના બંધ કવાર્ટરમાંથી રોકડા
રૂા. 10 હજાર તથા 70 હજારના સોના-ચાંદીના ઘરેણાની ચોરી થયાનો બનાવ સામે
આવ્યો છે. આ બનાવ અંગે આજે બી-ડિવિઝન પોલીસ મથકે કવાર્ટર નં. સી/3, 1/એ જૂના રેલવે કોલોની ગોધરાવાળી ધર્મશાળાની સામે રહેતા
અને રેલવે વિભાગમાં કોમર્શિયલ ઇન્સ્પેક્ટર તરીકે નોકરી કરતા મૂળ બિહારના પંકજકુમાર
વિજયકુમાર ગુપ્તાએ નોંધાવેલી ફરિયાદ મુજબ પત્ની એક અઠવાડિયાથી વતન બિહાર ગયા છે. ગત
તા. 25/11ના સંતાનો
સવારે સ્કૂલે ગયા હતા અને ફરિયાદી નવેક વાગ્યે ઘર બંધ કરી નોકરીએ ગયા હતા. બપોરે બાળકો
ઘરે આવ્યા હતા. ફરિયાદી રાત્રે પરત આવ્યા અને પાછળનો બેડરૂમ જોતાં સામાન વેર-વિખેણ
હતો અને કવાર્ટરનો પાછળનો દરવાજો તૂટેલો હતો. અજાણ્યા ચોર ઇસમ લોખંડના કબાટનો દરવાજો
અને લોકર તોડી તેમાંથી રોકડા રૂા. 10 હજાર
તથા સોનાનું મંગલસૂત્ર અને નાકની બાલી તથા ચાંદીનો વાટકો અને ચાંદીના ઘરેણા આમ 70 હજારના સોના-ચાંદીના દાગીના સહિત કુલ્લે રૂા. 80,000ના મુદ્દામાલની ચોરી થયાની ફરિયાદ નોંધાવી છે. ધોળા
દિવસે થયેલી આ ચોરી અંગે પોલીસે ફરિયાદ નોંધી છાનબીન આદરી છે.
