ભુજ, તા. 6 : તરુણીના ફોટા વાયરલ કરવાની ધમકી આપી શારીરિક શોષણ કરવાના
ત્રણ વર્ષ જૂના કેસમાં આરોપી હરેશ નાનજી જેપારને ખાસ પોક્સો કોર્ટે કસૂરવાર ઠેરવ્યો
હતો અને 10 વર્ષની કેદની સજા તથા રૂા. ચાર લાખનો દંડ ફટકારતો ધાક બેસાડતો ચુકાદો આપ્યો
હતો. 2021માં આચરાયેલા ગુનામાં અબડાસા તાલુકાના બિટ્ટા ગામમાં રહેતા આરોપીએ હરેશે તરુણીને
ધાકધમકી કરી મોબાઈલ ફોન આપ્યો હતો. બાદમાં
સંબંધ રાખવા તેને મજબૂર કરી હતી અને કોઈને જાણ ન કરવા ધમકાવી હતી. પોતાના મલીન ઈરાદા
પૂરા કરવા ભોગ બનનારને જબરદસ્તી પોતાના કાકાના ઘરે બોલાવી બિભત્સ ફોટા પાડયા બાદ સોશિયલ
મીડિયામાં વાયરલ કરવાની ધમકી આપી દુષ્કર્મ આચર્યું હતું અને કોઈને જાણ કરશે તો તેને
તથા તેના માતા-પિતાને જાનથી મારી નાખવાની ધમકી આપી હતી. આ કેસમાં અદાલતે રજૂ થયેલા
26 દસ્તાવેજી પુરાવા અને આઠ સાક્ષીને તપાસી આરોપીને તકસીરવાન ઠેરવ્યો હતો અને પોક્સો
સહિતની જુદી-જુદી કલમ હેઠળ 10 વર્ષની કેદ અને ભોગ બનનારને વળતર પેટે રૂા. ચાર લાખ ચૂકવવા
હુકમ કર્યો હતો. આ કેસમાં સરકાર પક્ષે પોક્સો સંબંધિત ગુનાઓ માટે ખાસ નિયુક્ત સરકારી
વકીલ એચ. બી. જાડેજાએ દલીલ કરી હતી, જ્યારે મૂળ ફરિયાદી તરફે ધારાશાત્રી ડી. વી. ગઢવી
સાથે એ. એન. મહેતા, વાય. વી. વોરા, એચ. કે. ગઢવી અને એસ. કે. ગઢવી હાજર રહ્યા હતા.
