કોરોનાના વધુ 23 કેસ : એકનું મોત

ભુજ, તા. 11 : તહેવારોમાં કોરોનાનું સંક્રમણ વધવાની ભીતિ સાચી ઠરી રહી હોય તેમ આજે વધુ 23 પોઝિટિવ કેસ નોંધાતાં કુલ નોંધાયેલા કેસનો આંકડો 786 પર પહોંચ્યો છે. ઓગસ્ટ મહિનાના 11 દિવસમાં નોંધાયેલા કેસનો આંક 256 પર પહોંચતાં આ મહિનામાં પોઝિટિવ કેસનો આંક નવા રેકોર્ડ સર્જે તેવી શક્યતાઓ નકારાતી નથી.ગઢશીશાના 64 વર્ષીય વૃદ્ધનો કોરોનાએ ભોગ લીધો છે. ડાયાબિટીસ-હાઈપર?ટેન્શનની બીમારીથી પીડાતા ઝવેરચંદ રંગાણીનો ગઇકાલે કોરોના રિપોર્ટ પોઝિટિવ આવ્યા બાદ મધરાતે તબિયત લથડતાં તેમનો જીવનદીપ બુઝાઇ ગયો હતો.એક કેસ જી.એમ.ડી.સી.ના કર્મચારીનો છે તો બીજો કેસ ગઢશીશા ગામના જ 64 વર્ષીય વૃદ્ધ અને ફ્લોરમિલ (ચક્કી) સંચાલકનો નોંધાયો છે. જેના કારણે ગામમાં વધારે ભયનો માહોલ જોવા મળ્યો છે. કારણ કે મૃતક ફ્લોરમિલ સંચાલકનો કોરોના રેપિડ રિપોર્ટ ગઇકાલે સાંજે પોઝિટિવ આવ્યા બાદ મોડીરાત્રે તબિયત બગડતાં તેમનું નિધન થયું હતું. તેમની અંતિમવિધિ પણ સરકારી નિયમ મુજબ સ્થાનિકના સ્મશાનમાં જ કરવામાં આવી હતી. આજે નોંધાયેલા કેસોમાં સૌથી વધુ નવ કેસ ગાંધીધામમાં નોંધાયા છે. ભુજ અને મુંદરામાં ચાર-ચાર તો અબડાસા-અંજારમાં બે-બે જ્યારે રાપર-ભચાઉમાં એક-એક કેસ નોંધાયા છે. કુલ પોઝિટિવ કેસનો આંક 786 પર તો સાજા થયેલા દર્દીઓની સંખ્યા 500ને પાર થઇ?છે. અક્ટિવ કેસની સંખ્યા 247 તો મોતનો કુલ આંકડો 34 થયો છે.આજે સંક્રમિત થયેલાઓમાં ગાંધીધામના એક તબીબ ઉપરાંત બે યુવાનો તબીબના ભાઇ હોવાનું સત્તાવાર રીતે જાણવા મળ્યું છે. રિપોર્ટ આવ્યા પૂર્વે મોત થયું છે એવા ગોપાલપુરીની મહિલાના પતિ કંડલા પોર્ટના મરીન વિભાગમાં ફરજ બજાવતા હોવાનું જાણવા મળ્યું છે. મુંદરાના કલાપૂર્ણ આશિષ સોસાયટીમાં એક કેસ કોરોનાનો આવતાં ડરનો માહોલ જોવા મળ્યો હતો. ડો. રીતુ પરમારે માહિતી આપતાં જણાવ્યું કે, 37 મકાન, સંખ્યા 109ને ક્વોરેન્ટાઇન કરવામાં આવ્યા હતા. આ સર્વેની કામગીરીમાં સંજયભાઇ?સોલંકી, ગિરીશભાઇ પટેલ, પીનલબેન તાવિયાડ, ક્રિષ્નાબેન જોષી તથા બારોઇ જૂથ ગ્રામ પંચાયતના ભોજરાજ ગઢવી, તલાટી અજયસિંહ જાડેજા સહિતના ઉપસ્થિત રહી કામગીરી કરી હતી તથા સમગ્ર વિસ્તારને સેનિટાઇઝ કરવામાં આવ્યો હતો. 

Crime

© 2020 Saurashtra Trust

Developed & Maintain by Webpioneer