મોટી રવમાં ખેતરના શેઢે ચારાની નીચે છૂપાવાયેલો 69 હજારનો દારૂ ઝડપાયો

ગાંધીધામ, તા. 23 : રાપર તાલુકાના મોટી રવ ગામની સીમમાં નીરણ (ચારો) નીચેથી પોલીસે રૂા. 68,620નો શરાબ જપ્ત કર્યો હતો. આ દરોડામાં બે શખ્સ પોલીસના હાથમાં આવ્યા ન હતા. રાપરની સ્થાનિક પોલીસ પેટ્રોલિંગમાં હતી દરમ્યાન બાતમીના આધારે મોટી રવ ગામની પૈયુ તરીકે ઓળખાતી સીમમાં દરોડો પાડવામાં આવ્યો હતો. અહીં ખેતરના શેઢાની બાવળની ઝાડી પાસે રાખેલી બાજરાની સૂકી નીરણ નીચેથી દાટેલ દારૂ મળી આવ્યો હતો.આ જગ્યાએથી પાર્ટી સ્પેશિયલની 750 એમ.એલ.ની 84 બોટલ, ક્રેજી રોમિયો 180 એમ.એલ.ના 235 ક્વાર્ટરિયા તથા રોયલ જનરલ રિઝર્વ વ્હીસ્કીનાં 48 ક્વાર્ટરિયા એમ કુલ રૂા. 68,620નો અંગ્રેજી શરાબનો જથ્થો જપ્ત કરવામાં આવ્યો છે. અહીં દારૂ રાખી તેનું વેચાણ કરનારા મોટી રવના દીપુભા રણછોડજી જાડેજા તથા નરપતસિંહ ઉર્ફે મુન્નો મહિપતસિંહ જાડેજા નામના શખ્સો હાજર ન મળતાં પોલીસની ઝપટમાં આવ્યા ન હતા. આ બન્નેને પકડી પાડવા આગળની કાર્યવાહી હાથ ધરવામાં આવી છે.  

© 2020 Saurashtra Trust

Developed & Maintain by Webpioneer