રાહત નહીં, રેડ એલર્ટ

કુંદન વ્યાસ- દેશભરમાં લોકડાઉન-તાળાબંધી એકવીસ દિવસથી વધુ લંબાશે નહીં એવી સ્પષ્ટતા કેન્દ્ર સરકાર દ્વારા કરવામાં આવી છે. ઇમરજન્સી જાહેર થવાની અને મુદ્દત લંબાવવાની અફવાઓને રદિયો આપવા માટે આવી સ્પષ્ટતા જરૂરી હતી. સુપ્રીમ કોર્ટને પણ જણાવાયું છે કે પરિસ્થિતિ અંકુશ હેઠળ છે. આ થોડી નિરાંતના સમાચાર વચ્ચે દિલ્હીના નિઝામુદ્દીનની ઘટનાએ શાસનને ચોંકાવી દીધું છે. સમગ્ર વિસ્તારને ઘેરીને નાકાબંધી કરવામાં આવી છે. તબલીગી જમાતના મરકઝમાં હાજરી આપનારા કેટલાક લોકો વાયરસનો ભોગ બન્યા છે. આ `સ્ફોટક' વિસ્તારની અસર તેલંગાણાથી આંદામાન નિકોબાર સુધી પહોંચી છે. સરકારે કહ્યું છે કે, આ સમય કોઇને દોષારોપણ કરવાને બદલે તેનો પ્રસાર અટકાવવાની જરૂર છે. આ અભિગમ યોગ્ય છે. જો કે આયોજકો સામે કેસ નોંધાયો છે. આ મામલામાં પ્રશ્ન એ છે કે 13મી માર્ચે દેશ-વિદેશથી 3400-આટલી મોટી સંખ્યામાં અફઘાનિસ્તાન-બાંગલાદેશથી ભારતમાં આવ્યા કેવી રીતે ? અને આટલા મોટા મેળાવડા-મરકઝની માહિતી કેમ મળી નહીં ? નિઝામુદ્દીનથી સેંકડો લોકો લખનઉની મસ્જિદમાં છુપાઇ રહ્યા તે પણ મોટી ચિંતાનો વિષય છે. વડાપ્રધાન મોદીએ સોમવારે ધાર્મિક નેતાઓના સહકારની વાત કરી છે. આ પ્રશ્ન કોમવાદ-ધર્મવાદનો નથી-રાષ્ટ્રધર્મ અને માનવસેવાનો છે. કોઇ પણ ધર્મ-હિન્દુ-મુસ્લિમ કે ઇસાઇ-આવા કોઇ પણ મેળાવડા રોકવાના પ્રયાસ કરીને પોલીસને માહિતી આપવી જરૂરી છે, નિઝામુદ્દીનનું પુનરાવર્તન કોઇ પણ હિસાબે થાય નહીં. એકવીસ દિવસની તાળાંબંધી લંબાશે નહીં પણ જે વિસ્તારો અસરગ્રસ્ત-સ્ફોટક હોય તેની નાકાબંધી અનિવાર્ય બનશે. આવા દસ જેટલા કેન્દ્રો નક્કી કરવામાં આવ્યા છે જેમાં મુંબઇ, પૂણે, અમદાવાદ વગેરે છે. મહારાષ્ટ્રમાં સૌથી વધુ 302 બીમારોની તબીબી તપાસમાં 72 કેસો પોઝિટિવ નીકળ્યા છે. વરલી કોલીવાડામાં પણ નાકાબંધી થઇ છે.મહારાષ્ટ્રમાં મુખ્યપ્રધાન ઉદ્ધવ ઠાકરેની પ્રથમ કસોટી છે અને ઝડપથી પગલાં લઇ રહ્યા છે. તમામ નેતાઓના માર્ચ મહિનાના પગારમાં કાપ મૂકીને શરૂઆત કરી છે. ગરીબોની જરૂરિયાતો પર ધ્યાન કેન્દ્રિત છે. ધારાવી જેવા વિસ્તારમાં લોકો સહકાર આપી રહ્યા છે પણ સોસાયટીઓમાં શિસ્ત ઓછી છે અને પોલીસવાન લાઉડ સ્પીકરથી સૂચના આપે છે.