ચૂંટણી પૂર્વેનો ગરમાવો; ગૌરવ યાત્રા આજે કચ્છમાં

ચૂંટણી પૂર્વેનો ગરમાવો; ગૌરવ યાત્રા આજે કચ્છમાં
ભુજ, તા. 12 : દીપોત્સવી પર્વની તૈયારીઓમાં મંદી, મોંઘવારી, જી.એસ.ટી.ના પગલે મોડા મોડા સક્રિય થયેલા કચ્છમાં રાજ્ય વિધાનસભાની ચૂંટણીના આગોતરા પ્રચારરૂપે ભારતીય જનતા પક્ષ?દ્વારા શરૂ કરાયેલી ગૌરવ યાત્રાએ ચેતન લાવી દીધું છે. ગુલાબી ઠંડી શરૂ થાય તે પહેલાં જ રાજકીય ગરમીએ દેખા દેતાં આખે આખા જિલ્લામાં એક સળવળાટ શરૂ થઇ ગયો છે ત્યારે જ આવતીકાલે મુખ્યમંત્રી વિજયભાઇ?રૂપાણી અને શનિવારે ઉત્તરપ્રદેશના મુખ્યમંત્રી યોગી આદિત્યનાથ અન્ય નેતાઓ સાથે કચ્છમાં ઉતરી રહ્યા હોવાથી સરહદી જિલ્લો રાજકીય દ્રષ્ટિએ વાયબ્રન્ટ બની ગયો છે. ગુજરાત વિધાનસભાની સંભવત: ડિસેમ્બરમાં યોજાનારી ચૂંટણી શાસક-વિપક્ષ માટે ખરાખરીનો જંગ સાબિત થાય  તેવા આગોતરા જ એંધાણ મળી રહ્યાં છે. કોંગ્રેસના ઉપાધ્યક્ષ, વડાપ્રધાન વારંવાર રાજ્યની મુલાકાત લઇને વિકાસને ડાહ્યો-ગાંડો ગણાવી રહ્યા છે ત્યારે મુખ્યમંત્રી વિજયભાઇ રૂપાણી તથા બહુ ગાજેલા ઉત્તરપ્રદેશના મુખ્યમંત્રી યોગી આદિત્યનાથ, હિમાચલપ્રદેશના યુવા નેતા અનુરાગ ઠાકુર, કેન્દ્રીય રાજ્ય ગૃહમંત્રી હેમરાજ આહીર, મનસુખભાઇ માંડવિયા શુક્ર અને શનિવારે કચ્છના પ્રવાસે આવી રહ્યા છે. તેઓ બે દિવસમાં કુલ્લ મળીને સંખ્યાબંધ સભાઓ, સત્કાર સમારંભમાં હાજરી આપશે અને કચ્છની છએ છ વિધાનસભા બેઠક પરના યોદ્ધાઓ પણ નક્કી કરશે. કચ્છમાં ગત ચૂંટણીમાં ભાજપે છમાંથી પાંચ બેઠક જીતી હતી અને વારંવાર છએ છ બેઠક ન મળી તેનું મનોમંથન પક્ષે કર્યું અને હવે એ કસર પણ કાઢી જ નાખવી હોય તેવા મજબૂત ઇરાદા બનાવ્યા છે. કદાચ તેથી જ છ બેઠક માટે સંખ્યાબંધ દાવેદારો આગળ આવ્યા છે. આ તમામ સંભવિત ઉમેદવારો પોતપોતાના વિસ્તારમાંથી જ્યારે મુખ્યમંત્રી તથા નેતાઓ પસાર થશે ત્યારે વધુને વધુ જનસમૂહ સાથે શક્તિ પ્રદર્શન કરવાના હોવાથી રાજકીય થનગનાટ રીતસર વર્તાઇ રહ્યો છે. રોડ ટચના વિશાળ હોર્ડિંગ અને સોશ્યલ મીડિયા દેશની સાથોસાથ કચ્છમાં પણ બે ભાગમાં વિભાજિત છે. કોંગ્રેસ તરફી અને મોદી વિરોધી છાવણીઓ ઊભી થઇ?છે. ભાજપના સંભવિત દાવેદારો કોઇ?કસર છોડવા માગતા ન હોવાથી જ્યાંથી નેતાઓ પસાર થશે, સત્કાર-સન્માન થશે કે સભા યોજાશે ત્યાં ભગવાનું વર્ચસ્વ દેખાય તેવી તૈયારીઓ ચાલે છે. પક્ષના ચિહ્નવાળા ધ્વજ અને રંગબેરંગી રોશનીની ઝાકઝમાળથી ભુજનો પ્રવેશમાર્ગ આર.ટી.ઓ. સર્કલ પાસેથી જ દિવાળી જેવો ભાસે છે. આ ચૂંટણી અને ગૌરવ યાત્રાને પગલે જિલ્લાના શ્રમિક-નાના વર્ગની દિવાળી સુધરી જાય તેવી સ્થિતિ સર્જાઇ છે. મંડપ, ડેકોરેશન, ખુરશી, જનરેટર, સાઉન્ડ સિસ્ટમ, ફૂલહાર, મીઠાઇ, કેટરીંગ બધા જ વ્યવસાયમાં ઓર્ડર અપાયા છે અને તેથી જ કચ્છ વાયબ્રન્ટ ભાસે છે.   

© 2017 Saurashtra Trust

Developed & Maintain by Webpioneer